UKZ dhe CCNO organizuar Kamp/Workshop dyditor për të drejtën pronësore me bazë gjinore
Center for Cooperation and Networking of Organizations (CCNO), në bashkëpunim me Universitetin Publik “Kadri Zeka”, ka përmbyllur me sukses kampin/workshopin dyditor me temën “E Drejta Pronësore me Bazë Gjinore – Vetëdijesimi i të Rinjve për të Drejtat Pronësore”, një aktivitet që synoi rritjen e njohurive dhe ndërgjegjësimit të të rinjve mbi të drejtat pronësore nga perspektiva e barazisë gjinore.
Dita e parë e workshop-it u hap me fjalë hyrëse nga Mediana Bislimi, Drejtoreshë Ekzekutive e CCNO-s, e cila theksoi rëndësinë e fuqizimit të të rinjve përmes edukimit juridik dhe nxitjes së barazisë gjinore si parakusht për një shoqëri më të drejtë dhe gjithëpërfshirëse.
Në fjalën e tij përshëndetëse, Vaxhid Sadriu, Prodekan i Fakultetit Juridik në Universitetin Publik “Kadri Zeka”, vuri theksin në rolin kyç të institucioneve akademike në formimin e juristëve dhe qytetarëve të ndërgjegjshëm për çështjet e barazisë gjinore dhe të drejtave pronësore.
Ai theksoi se e drejta pronësore nuk është vetëm çështje ligjore, por edhe çështje e drejtësisë sociale. Universiteti ka përgjegjësi që përmes edukimit të kontribuojë në ndryshimin e mendësisë shoqërore, veçanërisht në raport me barazinë gjinore dhe qasjen e barabartë në pronë.
Angazhimi i studentëve në aktivitete të tilla praktike është një hap i rëndësishëm drejt ndërtimit të një shoqërie më të drejtë dhe më të barabartë, ka thënë prodekani Sadriu.
Ndërkaq, Lindita Salihu, Zyrtare për Barazi Gjinore, theksoi rëndësinë e bashkëpunimit ndërinstitucional dhe rolin e të rinjve si agjentë të ndryshimit në promovimin dhe mbrojtjen e të drejtave pronësore të grave dhe vajzave.
Gjatë dy ditëve të workshop-it, nën facilitimin profesional të Fatbardha Emini dhe Majlinda Ostrogllava, pjesëmarrësit u njohën me konceptet bazë të së drejtës pronësore me perspektivë gjinore, kornizën ligjore kombëtare dhe mekanizmat institucionalë për mbrojtjen e këtyre të drejtave. Përmes metodave interaktive të punës, diskutimeve në grupe, studimeve të rasteve dhe ushtrimeve praktike, studentët patën mundësinë të ndajnë ide, përvoja dhe të zhvillojnë qasje konkrete për adresimin e sfidave që lidhen me pabarazinë gjinore në fushën e pronës.
Përmbyllja e workshop-it u karakterizua nga diskutime reflektuese mbi mësimet e nxjerra, si dhe nga ndarja e mirënjohjeve për studentët pjesëmarrës, duke vlerësuar angazhimin, kontributin dhe interesimin e tyre aktiv gjatë gjithë aktivitetit.
Ky aktivitet u realizua me mbështetjen financiare të Ministrisë së Kulturës, Rinisë dhe Sportit të Kosovës, duke kontribuar në avancimin e edukimit të të rinjve dhe promovimin e barazisë gjinore në fushën e të drejtave pronësore.
