U promovua monografie e shkollës “Avni Rrustemi”, Karaçevë e Epërme 1945-2025
Në një atmosferë të ngrohtë dhe të mbushur me emocione, sot u mbajt promovimi i monografisë së shkollës “Avni Rrustemi” në Karaçevë e Epërme, një ngjarje që mbledhi bashkë mësimdhënës, nxënës, prindër, përfaqësues të institucioneve dhe dashamirë të arsimit.
Nw promovim, autori i monografisë, z. Nijazi Kastrati, në fjalën e tij përshkroi rrugëtimin e gjatë dhe të lavdishëm të kësaj shkolle, duke sjellë në dritë momente historike dhe figurat që kontribuan në zhvillimin e procesit edukativo-arsimor ndër vite.
Vepra e tij përbën një kontribut të çmuar për dokumentimin e trashëgimisë arsimore dhe kulturore të kësaj ane.
Të pranishmit shprehën vlerësimet e tyre për punën e bërë dhe rëndësinë që ka kjo monografi për brezat e ardhshëm, duke e konsideruar si një urë lidhëse mes së kaluarës dhe së tashmes.
Aktiviteti u shoqërua me recitime dhe interpretime në piano nga nxënësit e shkollës, duke i dhënë një dimension edhe më të bukur ngjarjes.
Ky promovim jo vetëm që përkujton historinë e një institucioni të rëndësishëm arsimor, por edhe frymëzon për vazhdimësinë e përkushtimit ndaj dijes dhe edukimit. /Njazi Kastrati/
