U promovua monografia e prof. dr. Emin Krasniqit “Dajkoci, vendlindje e Heroit Metush Krasniqi”
Në dyzetvjetorin e ndarjes nga jeta të Heroit Metush Krasniqi, promovimi i monografisë bashkoi studiues, përfaqësues institucionalë, familjarë e bashkëvendës në një veprimtari kushtuar historisë së Dajkocit, trashëgimisë së tij dhe kujtesës kombëtare.
Nga Xhevdet Kallaba
Në një atmosferë nderimi për jetën dhe veprimtarinë e Heroit Metush Krasniqi, në ambientet e Bibliotekës Kombëtare “Pjetër Bogdani” në Prishtinë, u promovua monografia e prof. dr. Emin Krasniqit “Dajkoci, vendlindje e Heroit Metush Krasniqi”, botuar në Kamenicë më 2026. Veprimtaria u mbajt në dyzetvjetorin e ndarjes nga jeta të heroit, në një vit që shënon edhe njëqindvjetorin e lindjes së tij.
Në promovim morën pjesë përfaqësues të institucioneve qendrore e lokale, familjarë të heroit, studiues, autorë, veprimtarë të çështjes kombëtare dhe bashkëvendës. Përmes fjalëve të rastit dhe vështrimit për veprën, u theksua rëndësia e dokumentimit të historisë vendore dhe e përcjelljes së saj te brezat e ardhshëm.
Veprimtarinë e drejtoi redaktorja e librit, Edona Shkodra, e cila në hapje e cilësoi promovimin si një ngjarje ku bashkohen historia, kujtesa dhe krenaria kombëtare. Ajo theksoi se përurimi i monografisë përbën një akt respekti për të kaluarën dhe një përgjegjësi për ruajtjen e trashëgimisë historike.
“Libri është kujtesë e shkruar, dëshmi e kohës dhe urë lidhëse ndërmjet brezave”, u shpreh Shkodra, duke vënë në pah domethënien e botimit në përvjetorin e katërdhjetë të ndarjes nga jeta të Metush Krasniqit.
Begzad Baliu: Historia e vendlindjes në marrëdhënie me formimin e heroit
Një vështrim të gjerë për monografinë paraqiti recensuesi, prof. dr. Begzad Baliu, në referatin “Dajkoci si hapësirë e kujtesës dhe e formimit intelektual të Heroit Metush Krasniqi”. Në qendër të shqyrtimit të tij ishte marrëdhënia ndërmjet historisë së bashkësisë dhe formimit të personalitetit që, përmes veprimtarisë së vet, ndikon në fatin dhe vetëdijen e saj.
Baliu e vlerësoi veprën për ndërthurjen e historisë së vendbanimit me dëshmitë familjare, materialin onomastik e gjenealogjik, kulturën e komunikimit dhe biografinë politike. Sipas këtij leximi, Dajkoci shfaqet si një mjedis ku kujtesa, solidariteti dhe përvoja e qëndresës përcillen ndër breza.
Vëmendje të veçantë ai i kushtoi formimit intelektual të Metush Krasniqit përmes traditës familjare, shkollimit, mësimdhënies, studimeve juridike dhe marrëdhënies me librin. Veprimtaria e tij paraqitet si një përpunim dhe zgjerim i trashëgimisë së marrë nga vendlindja, së cilës ai i dha trajta të reja arsimore, kulturore dhe organizative.
Në referat u trajtua edhe oda si hapësirë e komunikimit dhe e gjykimit praktik, ku dëgjimi, përgjegjësia për fjalën dhe ndërmjetësimi merrnin rëndësi në jetën e bashkësisë. Duke çmuar pasurinë dokumentuese të monografisë, Baliu evidentoi gjithashtu nevojën për saktësi në referenca, qartësi kronologjike dhe dallim të qëndrueshëm ndërmjet dëshmisë e interpretimit. Këto vërejtje e vendosën vlerësimin e veprës në kuadrin e një shqyrtimi kritik shkencor.
Emin Krasniqi: Libri si përjetim dhe përgjegjësi
Autori, prof. dr. Emin Krasniqi, falënderoi pjesëmarrësit që, me praninë e tyre, ia shtuan domethënien promovimit në këtë përvjetor. Ai e përshkroi librin si shprehje të mendimeve dhe përjetimeve të autorit, ndërsa ndarjen e tij me lexuesin si një ndjenjë dhe përgjegjësi të veçantë.
Krasniqi shprehu mirënjohje për organizatorët, bashkëpunëtorët dhe të gjithë ata që e mbështetën gjatë rrugëtimit krijues. Veçmas falënderoi recensuesit prof. dr. Begzad Baliu, prof. dr. Imri Badallaj dhe të ndjerin prof. Xhevat Metush Krasniqi.
Ai shfaqi dëshirën që monografia t’u shërbejë lexuesve, nxënësve, studentëve dhe studiuesve, duke u bërë një nxitje për kërkime, diskutime dhe qasje të reja ndaj fushave që trajton.
Kadri Rahimaj: Një kontribut që plotëson kujtesën për Metush Krasniqin
Kryetari i Kamenicës, Kadri Rahimaj, e përgëzoi autorin për punën e realizuar dhe falënderoi familjen Krasniqi e të pranishmit. Ai kujtoi se viti 2026 ka një domethënie të dyfishtë për heroin: njëqindvjetorin e lindjes, të shënuar në gusht, dhe dyzetvjetorin e ndarjes nga jeta.
Rahimaj e përshkroi botimin si një afrim të ri të figurës së Metush Krasniqit me lexuesit. Duke iu referuar punës mbi tridhjetëvjeçare të autorit, ai theksoi se monografia plotëson mozaikun e botimeve për heroin dhe e sjell praninë e tij në bibliotekat familjare e në diskutimet e përditshme.
Kryetari vlerësoi edhe kontributin e Kamenicës në çështjen kombëtare dhe në periudhat e rëndësishme të shtetformimit të Kosovës. Ai uroi që suksesi i librit të përjetohet si një arritje e përbashkët e autorit dhe e bashkësisë.
Në përmbyllje, Edona Shkodra riktheu në vëmendje përgjegjësinë për dokumentimin dhe transmetimin e historisë. Ajo theksoi se kujtimi për Metush Krasniqin lidhet edhe me detyrimin që brezat e rinj të njohin vendlindjen, figurat historike dhe rrugën nëpër të cilën ka kaluar populli ynë.
Promovimi i monografisë u bë kështu një takim i kujtesës për heroin me përkushtimin kërkimor ndaj vendlindjes së tij, duke sjellë në vëmendjen e publikut një vepër që lidh historinë e Dajkocit me trashëgiminë shoqërore, kulturore dhe kombëtare.
Pas promovimit të librit, të pranishmit bënë fotografi të përbashkëta dhe evokuan kujtimet e tyre nga takimet e mëhershme/Info Rogana
