Trump kërkon mbylljen e dy mediave, veprimtarët shqiptarë: Për ne, roli i Zërit të Amerikës dhe Radios Evropa e Lirë do të mbetet historik
Presidenti amerikan, Donald Trump, ka nënshkruar një urdhër ekzekutiv që synon shkurtime të mëdha në shtatë agjenci federale, përfshirë Agjencinë e Shteteve të Bashkuara për Media Globale (USAGM).
Kjo agjenci mbikëqyr edhe Zërin e Amerikës (VOA) dhe Radion Evropa e Lirë (REL), duke ngritur shqetësime për të ardhmen e këtyre mediave me ndikim global.
Publicisti shqiptar në SHBA, Ruben Avxhiu, ka reaguar me shqetësim ndaj këtij vendimi, duke e cilësuar si një goditje të rëndë ndaj pushtetit të butë amerikan në botë.
“Burokracia e stërfryrë shtetërore amerikane ka plot se ku mund të shkurtohet e modernizohet. Është absurde që pas mbylljes së USAID-it, vijnë mbylljet e Zërit të Amerikës, Radios Evropa e Lirë dhe mjeteve të tjera të informimit publik amerikan në botë”, ka shkruar Avxhiu.
Sipas tij, ndërkohë që Rusia dhe Kina forcojnë mediat shtetërore dhe zgjerohen globalisht, SHBA po humbet një nga instrumentet më të rëndësishme të ndikimit.
“Për shqiptarët, roli i Zërit të Amerikës dhe Radios Evropa e Lirë do të mbetet historik. Zëri i tyre kumboi ndërsa perandoria sovjetike rrëzohej në kufi të dy epokave,” ka shtuar ai, duke e quajtur këtë vendim një fitore për Kremlinin.
Në të njëjtën linjë ka reaguar edhe Elez Biber, një prej figurave ikonike të VOA. Ai e ka cilësuar këtë vendim si një hap prapa për demokracinë dhe ndikimin amerikan në botë.
“The Voice of America, një fener shprese dhe e vërtetë për qindra miliona njerëz në mbarë botën, u shua sot në emër të reduktimit të burokracisë federale. Për më shumë se tetë dekada, VOA ka qenë një forcë jetike në promovimin e idealeve demokratike të Amerikës,” ka thënë Biber.
Ai ka paralajmëruar se kjo lëvizje do të dëmtojë imazhin e SHBA-së dhe do të lërë një boshllëk që kundërshtarët e saj mund ta shfrytëzojnë lehtësisht.
Mbyllja e VOA dhe REL mund të ketë ndikim të madh, veçanërisht në vendet ku këto media kanë qenë burimi i vetëm i lajmeve të pavarura, përfshirë rajonet e Ballkanit, Lindjes së Mesme dhe Evropës Lindore. Për momentin, nuk ka ende një datë të qartë për ndalimin e plotë të transmetimeve, ndërsa vendimi ka ngjallur reagime të ashpra brenda dhe jashtë SHBA-së.
