Tensione në protestën e banorëve të fshatit Sopanicë, tentojnë ta sulmojnë drejtuesin e ekskavatorit
Banorët e fshatit Sopanicë të Kaçanikut janë duke e kundërshtuar ndërtimin e hidrocentralit në lumin Lepenc.
Gjatë zhvillimit të protestës, disa nga protestuesit kanë tentuar të sulmojnë drejtuesin e ekskavatori, të kompanisë ndërtuese. Këtë e bëri të ditur, zëdhënësi i Policisë së Kosovës për rajonin e Ferizajt, Kanun Veseli i cili tha se rreth 20 persona në këtë zonë janë duke protestuar lidhur me pakënaqësitë e ndërtimit të hidrocentralit që është duke u ndërtuar.
“Sot, rreth orës 08:10 kemi pranuar një informacion se në mes të fshatrave Doganaj dhe Soponicë, tek ura e lumit Lepenc, ka filluar një protestë rreth 20 persona nga banorët e zonës ,lidhur me pakënaqësinë e ndërtimit të një hidrocentrali që është duke u ndërtuar. Policët e stacionit të Kaçanikut janë në vendin e ngjarjes dhe po monitorojnë situatën”, u shpreh Veseli.
“Gjatë zhvillimit të protestës, disa nga protestuesit kanë tentuar të sulmojnë drejtuesin e ekskavatorit të komanisë ndërtuese, mirëpo kanë intervenuar policia, situata është nën kontroll dhe po merren veprimet policore”.
