Të shtunën fillon festivali i dramës origjinale shqipe “Talia e Flakës 2026”
Aktivitetet e manifestimit tradicional “Flaka e Janarit” 2026 po vazhdojnë.
Mbrëmjen e shtune të 24 janarit, fillon festivali i dramës origjinale shqipe “Talia e Flakës 2026”.
Gjatë pesë netëve në Teatrin e Gjilanit, shikuesit mund të shohin drama nga disa teatro shqiptare.
Kryetari i Komunës së Gjilanit, Alban Hyseni, tha se po vazhdojnë aktivitete në kuadër të manifestimin tradicional “Flaka e Janarit”, edicioni i 35-të, me shumë aktivitete përkujtimore dhe kulturore në nderim të dëshmorëve tanë.
“Na u bashkoni në këtë organizim, që të ruajmë traditën dhe ta mbajmë gjallë flakën e lirisë dhe të kujtesës”, tha kryetari Alban Hyseni.
“Talia e Flakës 2026”, realizohet në mbështetje të Komunës së Gjilanit, përkatësisht Drejtorisë për Kulturë, Rini dhe Sport dhe Teatrit të Gjilanit e në organizim nga OJQ “Varg e Vi”.
Prej 24-28 janar 2026, për çdo mbrëmje, në orën 20:00, do të shfaqen dramat më të reja shqipe, në Teatrin e Gjilanit.
Më 24 janar, vjen shfaqja nga Teatri i Tetovës, “Dramë për të qesh”.
Më 25 janar, shfaqja “Sytë e ujkut” nga INTEGRA e Prishtinës.
Më 26 janar, shfaqja nga Teatri i Ferizajt, “Fluturimi mbi Teatrin e Kosovës”.
Më 27 janar, shfaqja nikoqire dhe jo garuese e Teatrit të Gjilanit, “God bless America”.
Festivali mbyllet me shfaqjen e Teatrit Kombëtar të Kosovës, “Gërrdia”, më 28 janar.
