Të martën, 13 qershor 2023, rikthehet me seancë Kuvendi i Komunës së Gjilanit
Përmes një njoftimi zyrtar, Zyra për Informim e Komunës së Gjilanit bënë të ditur se të martën, më 13 qershor 2023, mbahet seanca e pestë e Kuvendit të Komunës së Gjilanit.
Në fakt seanca e pestë është mbajtur në fund të muajit maj, por që është ndërprerë në mungesë kuorumi.
“Seanca e pestë e Kuvendit Komunal të Gjilanit, e cila ishte ndërprerë në mungesë kuorumi do të vazhdojë më 13.06.2023, nga ora 10:00, sipas rendit të njëjtë të punës”, njofton Zyra për Informim e Komunës së Gjilanit.
Kujtojmë që pas ndërprerjes së seancës disa herë, ka pasur zhvillime të ndryshme në këtë komunë, që kanë çuar deri te shkëputja e marrëveshjes së koalicionit në mes të Lëvizjes Vetëvendosje dhe Partisë Demokratike – dega në Gjilan.
Se si do të rrjedhë ecuria e punës së Kuvendit, mbetet të shihet në seancën e së martës, ndërkohë që subjekte të ndryshme që përfaqësohen në Kuvend janë deklaruar paraprakisht që do të jenë konstruktive në rrjedhën e punës së Kuvendit, ndërsa ka pasur edhe deklarata publike të akterëve opozitarë se Kuvendi duhet t’i takoj opozitës e cila tani është shumicë.
