Studentët e UKZ-së, vizitë studimore në Universitetin Zug të Zvicrës
Studentët e Universitetit Publik “Kadri Zeka” në Gjilan, nën udhëheqjen e Rektorit Prof. Dr. Bajram Kosumi si dhe Prorektorit për Bashkëpunim Ndërkombëtar Prof. Asoc. Dr. Dukagjin Leka, po qëndrojnë për një vizitë studimore një javore në Universitetin PH ZUG të Zvicrës.
Ata po vijojnë javën e shkëmbimit në PH ZUG, ku janë pritur nga studentët e PH ZUG dhe janë vendosur nëpër familjet e studentëve zviceran.
Në vizitën e tyre studimore, studentët e Universitetit “Kadri Zeka”, të shoqëruar edhe nga studentët e Universitetit ZUG, do zhvillojnë aktivitete të përbashkëta, takime e vizita edukative-arsimore, por do të kenë edhe vizita të tjera në qytet.
Ky projekt me PH ZUG është një nga projektet më të suksesshme të UKZ-së, sepse në vetvete ka përveç komponentë akademike edhe komponentë sociale dhe ndërkulturor për studentët e dy universiteteve.
Paraprakisht, në muajin tetor të këtij viti, dhjetë studentë nga PH ZUG kanë qëndruar në UKZ për një javë, duke pasur një agjendë mjaft të larmishme akademike dhe sociale.
Kjo vizitë do të jetë edhe një mundësi e re për të ngritur nivelin e bashkëpunimit, ku nga projekti i ri i fituar mes UKZ-së dhe PH ZUG, do të fillohet edhe me shkëmbimin e stafit të dy Universiteteve, thuhet në njoftimin e UKZ-së.
Vzita e studentëve dhe stafit të UKZ-së ka rezultuar me një takim të ndërsjellë mes drejtuesve të dy institucioneve akademike. Kështu ka njoftuar përmes faqes së tij në Facebook, Prorektori për Bashkëpunim Ndërkombëtar Prof. Asoc. Dr. Dukagjin Leka.
“Së bashku me Rektorin e UKZ-së, Prof. Dr. Bajram Kosumi patëm një takim shumë të suksesshëm me Rektoren e PH ZUG nga Zvicra, Prof. Dr. Esther Kamm dhe ekipën e saj. Diskutuam shumë çështje me rëndësi për të ardhmen e bashkëpunimit tonë, ku për vitin 2023 do të bëhet një protokol i veçantë me një numër aktivitetesh, duke vazhduar me shkëmbimin e studentëve”, ka shkruar ai.
Sipas prorektorit Dukagjin Leka, pritet që bashkëpunimi të thellohet edhe më tej, duke filluar me shkëmbime të stafit akademik në mes të dy universiteve, realizimi i punëtorive të përbashkëta ku do të përfshihen edhe shkollat nga Gjilani dhe nga Zugu; si dhe një shkollë verore do të organizohet deri në vitin 2024.
Bashkëpunimi vijon gjithashtu edhe me trajnime për metodologji të mësimëdhënies, hulumtimit shkencor, organizime të konferencave të përbashkëta, projekteve të përbashkëta, e shumë aktivitete të tjera, të cilat do të realizohen në vitet në vijim.
