Shkruan: Sabit Rrustemi – Tri dekada nga dalja e numrit të parë të revistës Letrare – Kulturore “Agmia”
Këtu e 30-vite më parë nisi rrugëtimin e saj revista letrare – kulturore “Agmia”, dhe atë pikërisht në 10 vjetorin e rënies heroike të Rexhep Malës e Nuhi Berishës, tash që të dy heronjë të Kosovës.
Atë kohë, rrethanat e shënimit të atij përvjetori ishin ndryshe nga ky 40-vjetor flijimi i këtyre dy heronjve, për lirinë e Kosovës.
Ishte edicioni i tretë i manifestimit kombëtar të kulturës, “Flaka e Janarit”, që ua përkushtoi një tribunë përkujtimore, ku referuan Ahmet Isufi, Hydajet Hyseni, Basri Musmurati, Xhelil Pajaziti dhe Enver Topalli.
Shkruan: Sabit Rrustemi
Ajo tribunë e mbajtur natyrisht u përcoll thuaja e plotë në numrin e parë të revistës letrare “Agmia”, nën titullin e përbashkët, “Dy jetëra në një ideal”, të cilin e udhëhoqa po dhe e përgatita për botim.
Do theksuar, meqë në 40-vjetorin e rënies së këtyre dy heronjëve, revista letrare – kulturore AGMIA shënon 30-vjetorin e saj, kurse për numrin i parë të revistës është përkujdesur shkrimtari ynë i shquar, Beqir Musliu, i cili shkroi dhe editorialin, ndërsa dizajnin dhe realizimin kompjuterik e bëri, poashtu një shkrimtar i njohur yni, tashmë i ndjerë, Abdullah Konushevci, kurse ballinën e punoi, (atë që e ka dhe sot në numrin e saj të 41-të), piktori Preshevar, Ismet Jonuzi.
Numri i parë i revistës, përpos krijimeve të shpërblyera të konkursit anonim letrar, “Flaka e Janarit 1994”, solli dhe një informacion të thuktë për nismën e atij manifestimi, dy vite më parë, nën titullin, “Udha e një manifestimi”, një shkrim në formë reportazhi për edicionin e tretë nga poeti Avdush Canaj, me titull, “Martirët nuk vdesin’, pastaj një informacion të plotë për krijimet e konkursit anonim letrar, si dhe Ora e Madhe Letrare, nga gazetari Hasan Bunjaku, nën titullin, “Tregimet mbi nivelin e poezive”.
Fitues të vendeve të para ishin, Ramadan Mehmeti, poezia e të cilit, “Kosovë i thonë Gjilan” që u lexua në Ora e Madhe Letrare, ndërsa fitues i konkursit anonim letrar për tregim ishte Xhemail Halili (Xhemë Karadaku), i cili zuri vendin e parë, kurse Naser Zymberi – vendin e dytë, dhe Iljaz Prokshi – vendin e tretë.
Për poezi janë ndarë dy vende të treta si dhe një numër sosh u përzgjodhën për botim në atë numër të revistës “Agmia”, e cila mbeti deri në ditët e sotme përcjellësja më besnike e këtij manifestimi.
Numri i parë i kësaj reviste u përmbyll me tri kronika kulturore nga manifestimi, përkatësisht me një shkrim për pjesët skenike nga Hasan Bunjaku, një për pjesën e artit pamor nga tashmë i ndjeri Demir Behluli, si dhe një kronikë kulturore për pjesën muzikore nga Izet Kallaba.
Në përgatitjen e numrit të parë të revistës “Agmia”, të cilën atë kohë e botoi Shoqata e Pavarur Kulturore dhe Forumi i Rinisë i LDK – Dega në Gjilan, ndihmuan edhe Hasan Bunjaku, Miradije Ramiqi, Nevzat Isufi, Ramadan Mehmeti, Shefik Shkodra e Avdush Canaj. Numri i parë i revistës “Agmia” është shtypur në shtypshjronjën e asaj kohe “Eurographig” të Prishtinës.
