Shkolla Verore e BE-së 2025: Rektori Hajrullahu tregon si erdhëm deri te inteligjenca artificiale
Në Fakultetin e Filologjisë nisi Shkolla Verore e BE-së, e cila sivjet do t’u kushtohet sfidave dhe perspektivave ndërdisiplinore gjatë përdorimit të inteligjencës artificiale.
Rektori i Universitetit të Prishtinës, prof. Arben Hajrullahu, në fjalën e tij hapëse tha se tashmë ndodhemi në fazën e pestë të zhvillimit teknologjik. “Faza e parë konsiderohet revolucioni industrial, kur njerëzit zbuluan makinat dhe e bënë punën në mënyrë më efikase. Pas kësaj erdhi faza e dytë, elektrifikimi; e treta ishte automatizimi; e katërta digjitalizimi dhe e pesta inteligjenca artificiale”, konstatoi rektori Hajrullahu.
Ai bëri thirrje që të përgatitemi për ndryshimet që po sjell dhe do të sjellë kjo inteligjencë, pasi asgjë më nuk do të jetë njësoj.
Rektori tha se as ekspertët më të mëdhenj të fushës së inteligjencës artificiale nuk e dinë saktësisht se si do të duket e ardhmja, derisa parashikoi se këto zhvillime teknologjike do të ndryshojnë edhe mënyrën e ligjërimit të profesorëve universitarë dhe komunikimin me studentët.
Edhe Johannes Stenbaek, shefi i bashkëpunimit në Zyrën e BE-së në Kosovë, tha se inteligjenca artificiale po e transformon botën, por theksoi se është përgjegjësi e jona që kjo inteligjencë t’i shërbejë së mirës publike.
Folën gjithashtu profesori i Universitetit të Aristotelit në Selanik, Nikolaos Panagiotou, zëvendësministri i Punëve të Brendshme, Bardhyl Dobra, dhe Florim Canolli, drejtor i Zyrës së Bashkëpunimit për Zhvillim në Zyrën e Kryeministrit.
Shkolla Verore e BE-së organizohet nga Young Cell Scheme dhe European Youth Card Kosovo, në partneritet me Universitetin e Prishtinës.
Gjatë katër ditëve sa do të zgjasë, do të flitet për përdorimin e inteligjencës artificiale në arsimim, media, ekonomi e biznes, për etikën, privatësinë dhe rregullativën ligjore të kësaj fushe, sigurinë kibernetike dhe tema të ngjashme.
Në fund, pjesëmarrësve të Shkollës Verore të BE-së do t’u jepen certifikata.
