Shkolla “Mulla Idriz Gjilani” në Velekincë, unike në shënimin e përvjetorit
Me një mori aktivitetesh kulturore e artistike, u shënua dita e shkollës “Mulla Idriz Gjilani” në Velekincë të Komunës së Gjilanit.
“Shkak i këtij takimi është Dita e Shkollës. Kjo ditë shënon emrin e një kolosi nga Anamorava, Mulla Idriz Gjilanit”, tha veç tjerash në fjalën hapëse të kësaj ngjarje, drejtori i kësaj vatre të arsimit, Fatmir Latifi.
Më pas krijuesit letrar në poezi, prozë, eseistikë e publicistikë, Mehmetali Rexhepi, Alisa Bekteshi, e Muhamet Halili, para nxënësve artdashës lexuan pjesë nga opusi i tyre krijues, duke ndarë njëherit përvoja letrare me nxënësit e interesuar për artin e të shkruarit.
Ndërsa Kryetari i ARS Club “Beqir Musliu”, z. Sabit Rrustemi, prezantoi pasqyrën e aktiviteteve vjetore që e karakterizojnë skenën letrare gjilanase, e që ndërlidhen me kalendarin e llojllojshmërisë organizative letrare nga vet Shtëpia Botuese “Beqir Musliu”, gjegjësisht nga Klubi Letrar “Beqir Musliu”.
Pasi kishin dëgjuar me kurreshje shkrimtarët e tyre të dashur e të preferuar, si dhe autorët e shquar të Anamoravës, ishte radha e nxnësve të shpalosnin talentin e tyre me prezantime e deklamime të krijimeve të realizuara që mbanin firmat krijuese të vet atyre.
Me të përfunduar pjesa letrare, në platonë e shkollës u mbajt një program cilësor artistik e prezantues, me pika të demonstruara fillimisht nga talentët e vegjël, fëmijët parashkollorë e ata të ciklit fillor.
Më pas në fjalën e tij përshëndetëse, nikoqiri i kësaj ngjarjeje, drejtori Fatmir Latifi, i falënderoi pjesëmarrësit e shumtë në numër, duke prezantuar njëherit një biografi të shkurtë të Mulla Idriz Gjilanit, emrin e të cilit mbanë me krenari kjo shkollë.
“Të dhënat historike tregojnë se Mulla Idriz Gjilani qysh nga mosha e njomë ishte dalluar për zgjuarësi, kurse suksesi shembullor e veçonte atë në krahasim me fëmijët e tjerë të moshës së tij. Për këtë arsye, si punëtor i madh që ishte treguar e dëshmuar me aftësi pedagogjike, ai kishte nisur mësimdhënien me klasët e ulëta dhe të larta”, tha drejtori Fatmir Latifi.
Pas fjalës së drejtorit të shkollës, vazhdoi rrjedha e programit të përgatitur, porse kësaj radhe me prezantimin e pikave atraktive sportive, në gjimnastikë e karate, nga talentë të kësaj shkolle. Ndërsa, nuk munguan vlerësimet e punës së mësimdhënës të dalluar me ç’rast disa nga punonjësit e kësaj vatre u nderuan me mirënjohje, për kontribut të çmuar ndër vite e dekada në edukimin e brezave të tërë nxënësve që kanë defiluar në kontinuitetin e jetëgjatësisë së kësaj shkolle.
Krejt në fund, po nga nxënësit artistë të shkollës u prezantuan punime në pikturë e vizatim, në një ekspozitë të hapur enkas për këtë shënim përvjetori, në foajenë e enterierit të godinës shkollore për të plotësuar në këtë mënyrë mozaikun e tërësisë strukturore organizative si dhe laramaninë prezantuese të aktiviteve të përgatitura nga pedagogët e nxënësit e kësaj vatre të diturisë.
