Rruga që pritet t’i japë hov zhvillimit të Karadakut të Kamenicës po merr formë
Investimi prej 2.9 milionë eurosh në aksin Shipashnicë–Desivojcë–Tërstenë synon të përmirësojë qarkullimin, të nxisë investimet dhe të krijojë mundësi të reja për banorët
Po vazhdojnë me intensitet punimet për asfaltimin e rrugës Shipashnicë–Desivojcë–Tërstenë, një prej projekteve më të mëdha infrastrukturore në Komunën e Kamenicës, me vlerë prej 2.9 milionë eurosh. Ky investim pritet të ndikojë drejtpërdrejt në përmirësimin e lidhjeve rrugore dhe në krijimin e kushteve më të mira për zhvillimin ekonomik e social të kësaj zone.
Gjatë një vizite në terren, ministri i Infrastrukturës, Dimal Basha, theksoi se kjo rrugë po asfaltohet për herë të parë, duke i dhënë fund një sfide shumëvjeçare për banorët e fshatrave që lidhen me këtë aks. Sipas tij, përmirësimi i infrastrukturës rrugore do të lehtësojë qarkullimin, do të krijojë kushte më të favorshme për jetesë dhe do të hapë perspektiva të reja për zhvillim.
“Me infrastrukturën e re po krijohen mundësi të reja për zhvillim ekonomik dhe për shfrytëzimin e potencialit të jashtëzakonshëm që ka kjo zonë”, ka deklaruar Basha, duke shtuar se investimet në rrugë janë investime në mirëqenie, zhvillim dhe të ardhmen e qytetarëve.
Përveç lehtësimit të lëvizjes, projekti pritet të ndikojë edhe në nxitjen e investimeve private, zhvillimin e turizmit rural dhe krijimin e kushteve që familjet të vazhdojnë jetën në vendlindjet e tyre. Rruga Shipashnicë–Desivojcë–Tërstenë konsiderohet një investim strategjik për këtë pjesë të Kamenicës, me ndikim afatgjatë në zhvillimin lokal dhe përmirësimin e cilësisë së jetës së banorëve.
