Rreth 50 mijë të evakuuar, zjarret masive përfshijnë Turqinë
Turqia po përballet me një valë zjarresh që kanë përfshirë disa rajone të vendit, duke detyruar autoritetet të evakuojnë mbi 50 mijë qytetarë, kryesisht nga provinca e Izmirit në bregdetin perëndimor.
Sipas Ministrisë së Pylltarisë, gjatë tre ditëve të fundit, ekipet e emergjencës janë përballur me 263 vatra zjarri në të gjithë vendin.
Zjarret kanë përfshirë edhe provincat Bilecik, Hatay, Sakarya dhe Manisa, ndërsa temperaturat e larta kanë vështirësuar përpjekjet e zjarrfikësve për t’i vënë nën kontroll, raporton BBC.
Ministri i Bujqësisë, Ibrahim Yumaklı, ka deklaruar operacionet e shuarjes po zhvillohen me intensitet të lartë dhe janë angazhuar të gjitha kapacitetet në terren.
Ndërkohë, Ministri i Shëndetësisë, Kemal Memişoğlu, bëri të ditur se 46 persona të lënduar nga zjarret janë duke u trajtuar në spitale, disa prej tyre në gjendje të rëndë.
Autoritetet i bëjnë thirrje qytetarëve në zonat e rrezikuara të bashkëpunojnë me ekipet e shpëtimit dhe të ndjekin udhëzimet për evakuim, ndërsa situata meteorologjike vazhdon të jetë alarmante.
