Ramadani: Po përmirësohemi nga ndeshja në ndeshje, FC DRITA s’ka pushim
Në kuadër të ndeshjeve kampionale ishte edhe ajo e xhiros së 3-të që për klubin tonë, FC DRITA nuk u zhvillua për shkak të ndeshjeve evropiane në atë kohë.
Takimi i mbetur i asaj jave do të zhvillohet nesër, e mërkure kundër FC Suharekës, në stadiumin ndihmës, (Te rrethi), në ora 13:00.
Timonieri, Zekerija Ramadani tha se e njohim kundërshtarin dhe janë marrë të gjitha masat për këtë ndeshje.
“Tani më tepër e njohim si skuadër nga ndeshja e fundit. Në bazë të saj kemi bërë analizën, kemi marrë masat, kemi nxjerrë gjërat e mira, kemi nxjerrë gjërat që kemi bërë gabim dhe jemi munduar të përmirësohemi. E dijmë që përballë kemi një skuadër të etur për suksese; një skuadër që është në rindërtim, ka potencial brenda si skuadër. Por, gjithesesi ne dihet për çka luajmë. Objektivi ynë është shumë i qartë, në çdo takim futemi për fitore. Në Suharekë ka qenë një fitore me shumë mund, sakrificë sepse ishim në disavantazh. Nesër nuk duhet ta lejojmë këtë të pranojmë këtë. Shpresoj në rezultat pozitiv, jemi të gatshëm, e kemi bërë në çdo takim një lojë ofansive dhe agresive, por të kemi kujdes edhe tek kundërsulmet e kundërshtarit që i kanë pikë të fortë”, ka thënë Ramadani.
Trajneri, Zekerija Ramadani tha poashtu se ditët e pushimit për shkak të ndeshjeve të kombëtareve nuk ishin të tilla për FC DRITA, pasi puna dhe ritmi i stërvitjeve nuk ka ndryshuar.
“Nuk kemi bërë ndeshje kontrolluese, jemi përqëndruar te ndeshja e nesërme dhe do punojmë për këto ndeshje që kanë mbetur. Pa dyshim se jam i bindur që ekipi është në formën e duhur, kemi punuar për të qenë në formën e duhur, kemi punuar sikur është fillimi apo mesi i kampionatit”, theksoi trajneri Ramdani.
Ai u pyet nëse FC DRITA tashmë ka siguruar titullin kampion vjeshtor, për çka përgjigjia ishte vetëm titulli kampion.
“As nuk e lodhi trunin për titullin e kampionit vjeshtor, e lodhim trunin për titullin e kampionit në fund të sezonit. Nuk na intereson ajo, na intereson vendi i parë kur do me ‘luftu’, me bo presionin, rrit diferencën, për të dhënë maksimumin dhe të jemi më të qetë në atë pozitë”, përfundoi Ramadani.
Ndeshja FC DRITA – FC Suhareka zhvillohet nesër, e mërkurë në “Stadiumin Ndihmës” (te rrethi), ora 13:00.
