Rahimaj organizon iftar për përfaqësuesit e Bashkësisë Islame në Kamenicë
Në atmosferën e muajit të Ramazanit theksohet rëndësia e bashkëpunimit dhe solidaritetit – shkruan TV Gjilani,
Kryetari i Komunës së Kamenicës, Kadri Rahimaj, ka shtruar një iftar të përbashkët për administratën e Këshillit të Bashkësisë Islame në Kamenicë, imamët e këtij këshilli, si dhe për një delegacion nga Bashkësia Islame e Kosovës.
Ky iftar u organizua në kuadër të aktiviteteve të muajit të shenjtë të Ramazanit, me theks të veçantë në rëndësinë e solidaritetit, mirëkuptimit dhe bashkëpunimit ndërmjet institucioneve lokale dhe komunitetit fetar.
Gjatë këtij takimi miqësor, kryetari Rahimaj falënderoi përfaqësuesit e Bashkësisë Islame për kontributin e tyre në ruajtjen e vlerave shpirtërore, në kultivimin e harmonisë ndërfetare dhe në shërbim të qytetarëve të komunës së Kamenicës. Ai theksoi se bashkëpunimi mes institucioneve dhe komuniteteve fetare është i rëndësishëm për ndërtimin e një shoqërie më të bashkuar dhe solidare.
Nga ana tjetër, përfaqësuesit e Bashkësisë Islame shprehën mirënjohjen për mikpritjen dhe mbështetjen institucionale, duke vlerësuar rëndësinë e dialogut dhe bashkëpunimit në të mirë të komunitetit.
Në përmbyllje të iftarit, të pranishmit përcollën urimet më të mira për muajin e Ramazanit, duke uruar paqe, shëndet dhe mirësi për të gjithë qytetarët.
