Qeveria “dritë jeshile” për CEFTA-n, ndryshime edhe në krye të Telekomit
Qeveria e Kosovës ka miratuar projektligjet për ratifikimin e tri protokolleve shtesë të CEFTA, duke shënuar një hap të rëndësishëm në avancimin e bashkëpunimit rajonal ekonomik.
Bëhet fjalë për Protokollin Shtesë 6 për tregtinë në shërbime, Protokollin Shtesë 5 që lidhet me aderimin dhe ndryshimin e marrëveshjes, si dhe Protokollin Shtesë 7 për zgjidhjen e mosmarrëveshjeve.
Ministrja e Industrisë, Ndërmarrësisë dhe Tregtisë, Mimoza Kusari-Lila, e cilësoi këtë zhvillim si një arritje të rëndësishme për vendin, duke theksuar se për herë të parë këto protokolle do të kalojnë për miratim në Kuvendin e Kosovës pa përfshirjen e UNMIK. Sipas saj, procesi është rezultat i një angazhimi të gjatë institucional dhe garanton trajtim të barabartë të protokolleve në të gjitha vendet anëtare të marrëveshjes.
Në të njëjtën mbledhje, ekzekutivi ka miratuar edhe ndryshimet në përbërjen e Bordit të Drejtorëve të ndërmarrjes publike Telekomi i Kosovës. Kryeministri Albin Kurti njoftoi se për kryesues të bordit është propozuar Shaban Neziri.
Po ashtu, Qeveria ka miratuar edhe projektrregulloren për ndryshimin dhe plotësimin e Rregullores për Integrimin e të Huajve.
Ministri i Punëve të Brendshme, Xhelal Sveçla, bëri të ditur se ndryshimet parashohin zgjatjen e afatit të strehimit elementar për personat me status refugjati, mbrojtje plotësuese dhe mbrojtje të përkohshme, përtej periudhës aktuale dyvjeçare.
Sipas tij, praktika ka treguar se një numër i konsiderueshëm i këtyre personave nuk arrijnë të integrohen plotësisht brenda këtij afati, prandaj është vlerësuar e nevojshme zgjatja e mbështetjes për të lehtësuar procesin e integrimit në shoqëri.
