Qërim hesapesh mes grupeve në Gjilan, plumbat depërtojnë në tri shtëpi banimi
Lagjja Iliria (ish-Kamnik) në Gjilan po shndërrohet në një zonë të rrezikshme banimi, pasi që aty jo rrallë ndodhin edhe konfrontime të armatosura mes grupeve rivale.
Jo më larg se të enjten në orët e para të mëngjesit, përkatësisht gjysmë ore pas mesnatës së të mërkurës, në këtë lagje ka ndodhur një shkëmbim zjarri mes grupeve, me ç`rast plumbat kanë depërtuar në tri objekte banimi dhe së paku në dy vetura të parkuara.
Dy plumba kanë depërtuar në dhomën e ndejës së Nexhat Ibrahimit, një plumb ka përfunduar në dhomën e fjetjes së familjes Haziri dhe një tjetër ka goditur në shtëpinë e Tahir Ibrahimit.
Banorët, teksa po përgatiteshin për gjumë, ose disa edhe kishin fjetur tanimë, kanë dëgjuar një rafal prej 4-5 krismash, të pasuara nga dy-tri krisma të tjera dhe kanë arritur t`i shohin dy vetura në parkimin e lagjes derisa po largoheshin nga vendi i ngjarjes.
Banorët nuk kanë arritur të identifikojnë personat, por policisë i kanë ofruar bashkëpunim në atë që kanë parë e dëgjuar.
Nexhat Ibrahimi thotë se në momentin kur ka ndodhur shkëmbimi i zjarrit, askush prej familjarëve nuk kanë qëlluar në shtëpi, përndryshe do të kishte pësuar ndokush prej tyre nga plumbat që kishin depërtuar brenda dhomës së ndejës.
“Ne duam siguri, sepse nuk kemi ku shkojmë përtej shtëpive tona”, thotë ai, derisa rikujton se në këtë lagje ndodhin shpesh incidente, shkëmbime zjarri, rrahje e fjalosje në hapësirat e parkimit.
Banorët rikujtojnë se aty përballë, para tri vitesh është vrarë në hyrje të banesës një 19-vjeçar dhe sot e atë ditë rasti ka mbetur i pazbuluar.
Ata kërkojnë siguri nga shteti, duke vendosur rend se pari në hapësirat e parkimit, i cili është i destinuar vetëm për banorët e lagjes, por aty vijnë e ndalojnë automjete edhe nga pjesët tjera të qytetit, madje edhe nga qytete tjera dhe nga regjioni.
