Pula: Letra dërguar Blinkenit ka një peshë serioze
Njëqind e njëzet e pesë shqiptaro-amerikanë janë drejtuar me një letër Sekretarit të SHBA-së, Antoni Blinken, përmes së cilës kanë kërkuar më shumë mbështetje për Kosovën.
Besnik Pula, veprimtar në SHBA, bëri të ditur se kjo nismë filloi bashkë me aktivistin Drilon Gashi, me idenë që të gjejë mbështetje te disa personalitete shqiptaro-amerikane, e që u mbështet shumë nga komuniteti shqiptaro-amerikan, që erdhi duke u zgjeruar në 25 shtete amerikane.
M. Miftari – RTK
“Ishte një jehonë e cila tregon se kishte një sentiment të akumuluar brenda komunitetit shqiptaro-amerikan, sidomos në ngjarjet e fundit në veri të Kosovës”, deklaroi Pula, në “Lajmet e fundit”, në RTK.
Ai më tej shtoi se letra ka një peshë serioze, teksa përmendi kongresistin Torres, kryetar i Grupit për çështje shqiptaro-amerikane, i cili ka bërë thirrje administratës amerikane që të dëshmojë një mbështetje më të fuqishme për Kosovën e të mos mbështesë presidentin serb Vuçiq, për vetë faktin se është një autokrat e, për më tepër, u shpreh ai, siç u pa edhe me ngjarjet e sotme, nuk ka intenca për paqe me Kosovën.
Veprimtari Pula shprehu optimizmin se komuniteti shqiptaro-amerikan do të angazhohet edhe më tutje për të ndikuar te administrata e Shtëpisë së Bardhë që të ketë një qasje tjetër, sidomos ndaj Serbisë.
Profesor Pula më tutje theksoi se organizimi i lobit shqiptaro-amerikan është një nevojë urgjente, për faktin se ka qenë i mangët zëri i këtij lobi viteve të fundit, derisa shfaqi shpresën se kjo letër mund të ndikojë në ndryshimin e qasjes së administratës së Vashingtonit ndaj Kosovës.
Sipas tij, kjo letër mund të ketë ndikuar edhe në deklarimin e emisarit për dialog të SHBA-së, Gabriel Escobar, i cili pati deklaruar se nuk ka probleme me Kosovën por me individë.
