Presidentja maqedonase dënon thirrjet antishqiptare në Kumanovë: U turpëruam! “Plumba urrejtjeje” ndaj bashkëqytetarëve tanë
Presidentja e Maqedonisë së Veriut, Gordana Siljanovska Davkova, i ka quajtur të turpshme thirrjet antishqiptare gjatë një eventi sportiv në Kumanovë.
Reagimi i saj të martën mbylli majën e piramidës institucionale të vendit, nga kryeministri te anëtarë të kabinetit dhe opozita politike, që i denoncuan si të papranueshme mesazhet raciste dhe ksenofobe të dëgjuara në ndeshjen e basketbollit mes kombëtareve të Maqedonisë Veriore dhe Rumanisë.
“Për shkak të analfabetizmit tonë sportiv, që ndodh për kush e di të satën herë, me të drejtë nuk ndalen reagimet ndaj incidentit të tmerrshëm në ndeshjen e basketbollit në Kumanovë, ku disa tifozë të papërgjegjshëm qëlluan me plumba urrejtjeje ndaj bashkëqytetarëve tanë shqiptarë — por në fakt, na goditën të gjithëve, madje edhe vetveten, dhe sërish jemi të turpëruar,” shkroi presidentja maqedonase në Facebook.
Mesazhe të llojit “Shqiptari i mirë është shqiptar i vdekur” dhe “Maqedoni e pastër” ishin disa nga parullat e shqiptuara nga tribuna ditën e shtunë në praninë e kryeministrit Hristijan Mickoski me një delegacion qeveritar, si dhe të kryebashkiakut të Kumanovës.
“Ju kujtoj se turpi nuk është vetëm për ata që preken nga këto fjalë, dhe nuk preken vetëm ata që dalin në sallë apo në fushë, por edhe ata që shohin dhe dëgjojnë për shkak të përhapjes së pakufishme. Duhet t’i rezistojmë urrejtjes, të kultivojmë brohoritjet, të mësojnë të brohorasim, të intensifikojmë betejën kundër paragjykimeve dhe përplasjeve mes ‘të ndryshmëve’. Duhet të njihemi, ta ndalim epideminë e urrejtjes, të reagojmë në kohë, ta ndëshkojmë atë. Brohoritja me pasion nuk është kurrë fyese dhe agresive,” përfundoi presidentja Siljanovska Davkova.
Reagimet për incidentin në Kumanovë kanë qenë të shumta nga zyrtarët më të lartë edhe në Shqipëri e Kosovë. Komiteti i Helsinkit për të Drejtat e Njeriut në Maqedoninë e Veriut po ashtu e dënoi gjuhën e urrejtjes të shprehur nga një grup i vogël tifozësh, të cilët kanë nisur të hetohen nga Prokuroria Publike e Kumanovës.
Federata Ndërkombëtare e Basketbollit njoftoi po se ka nisur një hetim të vetin në bashkëpunim me me federatat kombëtare të përfshira, si dhe me autoritetet lokale dhe forcat e rendit.
