Policia e Kosovës feston 26 vjetorin me fëmijë në shesh dhe me Policinë e Shqipërisë
Prishtinë, 5 shtator 2025 – Me rastin e shënimit të 26 vjetorit, Policia e Kosovës ka organizuar një sërë aktivitetesh të ndryshme policore dhe sportive, siç ishin garat në futboll, qitje me armë zjarri dhe volejboll, të cilat janë realizuar javë më parë.
Aktivitetet kanë vazhduar edhe sot, ku në sheshin Zahir Pajaziti në Prishtinë është bërë një demonstrim i njësive policore para fëmijëve të grupmoshave të ndryshme shkollore.
Aktiviteti i realizuar në sheshin Zahir Pajaziti u përcoll nga afër nga ministri në detyrë i Punëve të Brendshme z. Xhelal Sveçla dhe drejtori i Përgjithshëm i PK-së kolonel Gazmend Hoxha, të cilët iu drejtuan me nga një fjalë rasti të pranishmëve në këtë aktivitet policor, ku u vlerësua lartë roli, puna dhe angazhimi profesional i PK-së për këto vite, si një nga shtyllat më kryesore të sigurisë në shtet.
Kremtimin e 26 vjetorit e bëri më madhështore edhe prania e Policisë së Shtetit të Republikës së Shqipërisë, të cilët morën pjesë në një garë vëllazërore sportive në lojën e volejbollit me zyrtarët policorë të Policisë së Kosovës.
Dy drejtorët e policive, drejtori i Përgjithshëm i Policisë së Shtetit, Drejtues Madhor Ilir Proda dhe drejtori i Përgjithshëm i PK-së kolonel Gazmend Hoxha, përveç adresimit me nga një fjalë rasti shkëmbyen mirënjohje dhe pranuan fanella të ekipeve kombëtare të të dy shteteve nga kryetarët e federatave të volejbollit të Kosovës dhe Shqipërisë, me fanellat e të cilave zhvilluan edhe lojën sportive.
Kjo lojë sportive tregoi dhe njëherit dëshmoi bashkëpunimin vëllazëror në mes të dy policive, jo vetëm në fushën e sigurisë por edhe të aktiviteteve të tjera të përbashkëta sportive.
Të dy drejtorët përveç urimit të 26 vjetorit u zotuan se do të vazhdojnë të punojnë bashkërisht në interes të sigurisë dhe zhvillimit e avancimit profesional të të dy policive në fusha të ndryshme.
Sot, gjithashtu, në të gjitha drejtoritë rajonale policore nga ora 10:00-14:00 ka qenë porta e hapur, për pritjen e qytetarëve që kanë shprehur interesim për t’i vizituar stacionet policore dhe për t’i takuar nga afër zyrtarët policorë.
Aktivitetet për 26 vjetorin e PK-së do të përfundojnë me rastin e ceremonisë solemne e cila do të mbahet nesër me datën 06.09.2025 në orën 19:00 në Drejtorinë e Përgjithshme të Policisë së Kosovës.
Policia e Kosovës siguron qytetarët se gjithmonë do të vazhdojë të shërbejë me nder dhe profesionalizëm të lartë ashtu siç ka shërbyer për tërë këto vite, duke qenë institucioni më i besueshëm dhe transparent, jo vetëm në rajon por edhe më gjerë.
