Policia e Gjilanit vazhdon aktivitetet sensibilizuese me fëmijët në kuadër të sigurisë së tyre
Gjilan, 22 korrik 2025 – Në kuadër të angazhimit të vazhdueshëm për edukimin dhe ndërgjegjësimin e fëmijëve për çështje të sigurisë në trafikun rrugor, Njësiti i Sektorit dhe ai i Policisë në Komunitet të Stacionit Policor në Gjilan kanë mbajtur një ligjëratë informuese me fëmijët pjesëmarrës të kampit veror të organizuar nga Future School në Gjilan.
Aktiviteti është zhvilluar me fëmijë të moshave 4 deri në 12 vjeç, aktivitet i cili kishte për qëllim
njohjen e tyre me punën e përditshme të Policisë së Kosovës si dhe rëndësinë e respektimit të
rregullave të sigurisë në trafikun rrugor.
Përmes metodave interaktive, policët kanë ndarë informacione rreth rolit të policisë në ruajtjen e rendit dhe qetësisë publike dhe rregullave bazë të trafikut dhe rëndësisë së kujdesit gjatë lëvizjes në rrugë.
Drejtoria Rajonale e Policisë në Gjilan mbetet e përkushtuar në përkrahjen e iniciativave që
kontribuojnë në edukimin, mbrojtjen e fëmijëve dhe respektit në institucione arsimore.
