Petkoviq ndërprenë vizitën në Kosovë, fajëson kryeministrin Kurti
Nga: Jeton Musliu – RTK
Vetëm disa orë pasi erdhi në Kosovë, me leje të autoriteteve kosovare, Petar Petkoviq, drejtori i të ashtuquajturës Zyrë për Kosovën në Qeverinë e Serbisë, ka ndërprerë vizitën.
Petkoviq deklaroi për mediat serbe se ka ndërprerë vizitën pasi institucionet kosovare ia kanë ndaluar 80 përqind të plan programit që ai kishte parashikuar.
Nga institucionet e Kosovës ende nuk ka ndonjë sqarim, ndërkohë që mëngjesin e sotëm, në kishën e Pasjanit, Petkoviq mori pjesë në liturgjinë me rastin e festës së Shën Vasilit, ceremoninë e së cilës e drejtoi peshkopi ortodoks i Rashkë-Prizrenit, Teodosije.
“Përkundër të gjitha përpjekjeve të Prishtinës që vazhdimisht ta ndalojë praninë time në Kosovë, sot jam këtu në krahinën tonë jugore dhe me popullin tonë po festoj sot festën e Shën Vasilit”, tha Petkoviq.
Megjithatë, pas ceremonisë, ai tha se me vendim të institucioneve të Kosovës, të cilave ai iu referua si “të përkohshme”, iu ndalua të marrë pjesë në prerjen e tortës sllave në sheshin “Serbia” në fshatin Kufcë e Eperme si dhe në përkujtimin e Shën Petkës në Leposaviq.
“Dje rreth orës 16:00 është miratuar plotësisht vizita siç e kam paralajmëruar. Mirëpo rreth mesnatës kam marrë një e-mail të ri ku thuajse 80 për qind e programit të vizitës sime ishte ndaluar”, deklaroi Petkoviq, raporton RTKlive.
Përgjegjës për këtë anulim të vizitës, Petkoviq e bëri kryeministrin e Kosovës, Albin Kurti, pavarësisht se lejet e tilla miratohen ose refuzohen nga Ministria e Punëve të Jashtme të Kosovës në koordinim me Ministrinë e Punëve të Brendshme. Sipas tij, Kurti tani po godet qirinjtë dhe tortat e festës.
“Ai jo vetëm që më ndalon të shkoj në manastir në territorin e Kosovës, por tani më ndalon të marr pjesë në ndonjë ceremoni fetare”, ka theksuar Petkoviq, duke shtuar se megjithatë, Serbia do të vazhdojë të investojë në të gjitha vendbanimet e komunitetit serb në Kosovë.
Sipas planit të vizitës, Petkoviq do të merrte pjesë në prerjen e tortës festive, në fshatin Kufcë e Epërme në ora 12:00.
Kurse të enjten, në ora 10:45, Petkoviq do të vizitojë komunën e Leposaviqit, ndërsa në ora 11:00 në Qendrën e Kulturës “Sava Deçanac” në Leposaviq do të merrte pjesë në kremtimin e festës së Shën Petkës.
Më 14 tetor, Petkoviqit iu ndalua hyrja në Kosovë, ku duhej të merrte pjesë në ceremoninë e Patriarkut Porfirie në Patriarkanën e Pejës.
Gjashtë ditë më parë, Petkoviqit iu nda “Çmimi i Tetorit” me rastin e Ditës së Komunës së Leposaviqit, mirënjohja më e lartë e komunës.
