Pesë vite dhimbje e krenari, përkujtojmë gazetarin e themeluesin e Radio Star – Xhavit Salihu
Mbrëmja e 12 dhjetorit 2017 për familjen Salihu, shoqërinë, qytetin e Gjilanit por edhe më gjerë, ishte një mbrëmje e pikëllimit pasiqë nga ne u nda ish-gazetari e themeluesi i Radio Star, Xhavit Salihu, duke na lënë të pikëlluar por krenar me punën e tij profesionale.
Gjithashtu ai ishte një qytetar e shok që vështirë të përsëritet për një kohë të gjatë.
Shkruan: Sylejman Ismajli
Xhavit Salihun ishte dhe do të mbetet një vizionar i gazetarisë, i kulturës e mbi të gjitha ai ishte me virtytet të larta njerëzore e profesionale, prandaj ka lënë gjurmë të pashlyera kudo që u paraqit me profesionin e tij të gazetarisë.
Xhaviti ishte një qytetar i devotshëm i këtij vendi, ai që në fëmijëri e deshti muzikën, kulturën e artin. Xhaviti ishte edhe koleksionues i disqeve të gramafonit me këngëtarët më me zë të kohës.
Salihu me të madhe e deshti zejen e gazetarisë, nga dashuria e tij ndaj mediumeve ai me shumë profesionalizëm themeloi “Radio Star” në vitin 2002, duke i shtuar popullit të tij një dritare informative.
Ishin këto valët 96,4 Mhz, ku jehonin në territorin e Anamoravës me emisione të larmishme. Kjo radio u bë familje e dytë në shoqërinë tonë për cilësinë dhe seriozitetin që kishte ky medium.
Për ish-gazetarin Xhavit Salihun, hapja e një mediumi të tillë kishte emancipimin e edukimin e shoqërisë e informimin e drejt tek dëgjuesit e saj të rregullt.
Ai po jetësonte një ëndërr të fëmijërisë së tij duke qenë besnik i madh i shoqërisë kosovare me punën që po bënte në radion e tij. Edhe pse në kushte të vështira të asaj kohe Xhaviti nuk ndahej me ditë të tëra nga studio e tij me të vetmin qëllim që dëgjuesit e “Radio Star” të jenë të kënaqur me atë se çka ofronte me programet e tij.
Xhavit Salihu në jetën e tij kishte një ëndërr që “Radio Star” të jetë një gurëthemel i
diturisë e edukimit të brezave të ndryshëm, dhe këtë e arriti me shumë sukses pasi pas tij la dy djemtë e tij shumë të talentuar, Arbresh e Flakron Salihu, të cilët jo që po trasojnë rrugën e prindit të tyre por kanë modernizuar mediumin “Radio Star” me mjetet më bashkëkohore, dhe në kohën e digjitalizimit botëror sot ata pa asnjë pengesë kanë bërë që të dëgjohen me kënaqësi valët 96.4 Mhz, të “Radio Star” në tërë rruzullin tokësor.
“Radio Star” sot ka të përmbushura të gjitha kriteret e kërkuara nga KPM me staf e teknologjine më të lartë të kohës.
Xhavit Salihu tani e pesë vite na mungon çdo ditë, jo vetëm shoqërisë e familjes së tij, por edhe dëgjuesve të cilët i shoqëroi plot 15 vite. E ne do të jemi krenar që një jetë të tillë e kaluam me një njeri të kulturuar e vizion të qartë siç ishte gazetari, Xhavit Salihu.
