Pensionohet gjenerali i Policisë së Kosovës, Reshat Maliqi
Pensionohet gjenerali i Policisë së Kosovës, Reshat Maliqi
Është pensionuar sot Gjenerali i Policisë së Kosovës, Reshat Maliqi, njëherësh doktor i shkencave të kriminalistikës.
Pas 50 viteve në shërbim të atdheut, qytetarëve dhe familjes, duke qenë bartës i gradave dhe pozitave më të larta në Policinë e Kosovës, Kolonel Maliqi mbyll me dinjitet një kapitull të rëndësishëm në jetën e tij profesionale.
Një rrugëtim i mbushur me sfida, përkushtim dhe sakrifica – por gjithmonë me nder, integritet dhe profesionalizëm.
Ai ishte dhe mbetet shembull i oficerit të karrierës – model i një eprori të lartë që gjithmonë i qëndroi besnik misionit të tij për siguri dhe drejtësi.
Ish-komandanti i Policisë së Kosovës, para luftës, ishte arrestuar me ish-grupin e policëve shqiptarë, të cilët e kishin lënë punën, por kishin vazhduar aktivitetin e tyre në kuadër të institucioneve të Republikës së Kosovës, si aktivistë sindikalë.
Duke qenë se Maliqi si xhudist kishte një fizik të zhvilluar, serbët ia kishin frikën edhe duarlidhur.
Në sallën e gjyqit në Gjilan, ku po mbahej seanca e grupit të Gjilanit, Maliqi ishte sjellë duarlidhur si dëshmitar dhe gardianët kishin refuzuar t`i hiqnin prangat edhe gjatë dëshmisë.
“Ky është i rrezikshëm”, kishin thënë ata.
Për brutalitetin që ishte ushtruar ndaj tij në burgun famëkeq të Prishtinës (tani muze), kishte treguar asokohe edhe avokati i tij Hasan Hoti, i cili madje kishte shfaqur frikën se klienti i tij zor se mund të mbijetonte gjithë ato tortura.
Një kohë të dënimit prej 6 vitesh e ka vuajtur në burgun hetues të Prishtinës, ku shtypej me forcë çdo iniciativë për liri apo kundërshtim të politikës jugosllave.
Pas luftës, për një kohë, Maliqi ka qenë Komandant i Policisë së Kosovës, prej nga ishte shkarkuar në mënyrë të padrejtë.
12 vjet ka zgjatur pritja e tij për të vënë drejtësi lidhur me shkarkimin e tij nga kjo pozitë në vitin 2011.
Gjykata ka vërtetuar se me shkarkimin e Maliqit, janë shkelur dispozitat ligjore nga Qeveria e Kosovës. /Mediafokus.info
