Pas Leon Avdullahut, Kosova synon edhe një tjetër talent nga Zvicra
Federata e Futbollit të Kosovës po punon për të mos lënë t’i shpëtojë një tjetër talent i Zvicrës.
Fjala është për Albian Hajdarin, 22-vjeçarin që këtë javë u transferua te Hoffenheim, ku tashmë do të luajë bashkë me Leon Avdullahun dhe sulmuesin kosovar, Fisnik Asllani.
Media zvicerane “Blick” shkruan se situata e Hajdarit ndryshon nga ajo e Avdullahut, pasi ky i pari është grumbulluar disa herë nga trajneri Murat Yakin në kombëtaren e Zvicrës. Ai ishte pjesë e përgatitjeve për Kampionatin Evropian një vit më parë, më pas u thirr në ndeshjet e Ligës së Kombeve kundër Serbisë dhe Spanjës, si dhe në miqësoret me Irlandën e Veriut dhe Luksemburgun.
Pikërisht në ndeshjen kundër Luksemburgut, ai debutoi për 45 minuta me kombëtaren helvete, por si miqësore kjo nuk ia mbyll rrugën për të përfaqësuar një komb tjetër.
Ky mbetet shansi i Kosovës, e cila prej muajsh është duke tentuar ta bind mbrojtësin e majtë, të rritur te FC Basel, që të zgjedhë fanellën “dardane”. Nëse në Zvicër konkurrenca në qendër të mbrojtjes është e ashpër, te Kosova ai do të kishte një vend të sigurt përkrah kapitenit dhe yllit të Napolit, Amir Rrahmani.
Aktualisht, Hajdari ka fokus të plotë te aventura e tij e re në Bundesliga. Pas vetëm 23 minutash të luajtura me Luganon në fillim të sezonit, mbrojtësi synon ta shfrytëzojë pauzën e përfaqësueseve për t’u përmirësuar në aspektin fizik e taktik dhe për t’i treguar vlerat te Hoffenheim.
FFK ka ende kohë ta bindë 22-vjeçarin, ndërsa për Federatën e Zvicrës mbetet dilema nëse do ta lejojë një tjetër talent të zgjedhë rrugën e Kosovës, pas Avdullahut dhe rasteve të ngjashme më herët.
Për Hajdarin ka folur edhe përzgjedhësi i kombëtares zvicerane, Murat Yakin.
“Albian Hajdari nuk është midis tyre. Pas një vere të vështirë dhe transferimit të vonë në Hoffenheim, ai tani do të përqendrohet te klubi. Ne kemi një plan për të, por do ta trajtojmë atë pas ndeshjeve të shtatorit”, u shpreh Yakin.
Ndryshe, Zvicra do të përballet me Kosovën me datën 5 shtator në Bazel, njësoj sikur para dy viteve, sfidë që ishte mbyllur me barazim 1-1.
