“Pako e presidentes”, Abdixhiku tregon propozimin që bëri për çështjen e buxhetit të komunave: Nuk pati asnjë gatishmëri për ta çuar para
Kreu i LDK-së, Lumir Abdixhiku ka reaguar pas deklaratës së djeshme të presidentes Osmani e cila tha se ka kërkuar nga partitë politike të mblidhen dhe të votojnë për çështjen e buxhetit për tri komuna, duke theksuar se kjo çështje ka qenë si pikë e veçantë në rend dite, raporton Gazeta Online Reporteri.net.
Ajo ka bërë të ditur se partitë kanë vendosur të mos jenë të pranishme në seancë, duke çuar në mosmiratimin e buxhetit.
Abdixhiku ka thënë se e vërteta është ndryshe.
Ai ka shkruar se mbrëmjen e nominimit të Glauk Konjufcës, i ka shprehur gatishmërinë Presidentes së vendit që të votohet një pako, e cila madje mund të quhej edhe Pako e Presidentes; me zgjatimin e buxhetit për 3 muaj, me votimin e Ligjeve të Prishtinës e Gjilanit, me sigurimin e pagave për RTK-në, si dhe me votimin e Pakos Evropiane të Rritjes.
Kreu i LDK-së, ka thënë se po atë mbrëmje, menjëherë pas mandatimit të Konjufcës, Presidentja e ka kontaktuar, duke i thënë se ka komunikuar me mandatarin, ua ka përcjellë porosinë Lëvizjes Vetëvendosje, dhe ata janë shprehur shumë pozitivë për këtë ide.
Abdixhiku tutje shkruan se në ato momente ka kontaktuar Memli Krasniqin si Kryetar të PDK-së; Ramush Haradinajn si Kryetar të AAK-së; dhe Fatmir Limajn si Kryetar të Nismës dhe të tre këta janë njoftuar se ka një mundësi që të votohet një pako e tillë për të mirën e vendit.
Në atë mbrëmje, ai thotë se ka kontaktuar dhe disa ambasadorë të QUINT-it, mirëpo sipas tij, nga ai moment, nuk ka lëvizur asgjë për 15 ditë.
“15 ditë pa asnjë komunikim; përveç një vonese të pakuptueshme në shpenzimin e ditëve para një krize të paralajmëruar. E pakuptueshme për mua; e lexueshme si tendencë për krijim krize dhe fajësim politik”, ka shkruar ndër të tjera ai.
Postimi i plotë:
Dje, i zënë me punët tona organizative e të nominimit, më paska ikur deklarimi i Presidentes, e më pas edhe ekzaltimi i Sanço Pançove që paskan shpërndarë “të vërtetën” e tyre.
E vërteta është kështu – dhe për këtë qëndroj para vendit dhe Zotit:
Në mbrëmjen e nominimit të Glauk Konjufcës, i kam shprehur gatishmërinë Presidentes së vendit që të votohet një pako, e cila madje mund të quhej edhe Pako e Presidentes; me zgjatimin e buxhetit për 3 muaj, me votimin e Ligjeve të Prishtinës e Gjilanit, me sigurimin e pagave për RTK-në, si dhe me votimin e Pakos Evropiane të Rritjes.
Në mbrëmje, po atë mbrëmje, menjëherë pas mandatimit të Konjufcës, Presidentja më ka kontaktuar, duke më thënë se ka komunikuar me mandatarin, ua ka përcjellë porosinë Lëvizjes Vetëvendosje, dhe ata janë shprehur shumë pozitivë për këtë ide.
Në ato momente kam kontaktuar Memli Krasniqin si Kryetar të PDK-së; Ramush Haradinajn si Kryetar të AAK-së; dhe Fatmir Limajn si Kryetar të Nismës. Të tre këta janë njoftuar se ka një mundësi që të votohet një pako e tillë për të mirën e vendit.
Në atë mbrëmje kam kontaktuar dhe disa ambasadorë të QUINT-it.
Nga ai moment, nuk ka lëvizur asgjë për 15 ditë.
15 ditë pa asnjë komunikim; përveç një vonese të pakuptueshme në shpenzimin e ditëve para një krize të paralajmëruar. E pakuptueshme për mua; e lexueshme si tendencë për krijim krize dhe fajësim politik.
Ky propozim, i hapur, diskutuar e nxitur nga vet unë, na u kthye në tavolinën e caktimit të zgjedhjeve, dhe atë me stilolaps mbi nënshkrimin e dekretit për zhbërje të Kuvendit. Edhe aty, thash, para të gjithëve, krejt në fund të fjalës sime, se nëse ka gadishmëri nga të gjithë LDK nuk është kundër. Ky deklarim është i regjistruar zyrtarisht.
Nuk pati asnjë lëvizje, anipse ishte vonë. Ani pse ishin shpenzuar 15 dië pa asnjë nevojë. Ani pse nuk kishte asnjë gadishmëri as për ta diskutuar bashkarisht në mjë vend këtë ide.
Sot habitem se me sa lehtësi fshihet ky fakt dhe kjo e vërtetë. E kuptoj që jemi në betejë politike, por në këtë betejë na duhet të kemi minimalisht korrektësi dhe sjellje njerëzore.
Kjo është e vërteta.
Gjithsesi, per të gjitha sfidat ka zgjidhje. Do ta shihni dhe në ditët në vijim se bllokada ishte e qëllimshme. Nuk është e re. Po zgjatë tash e 12 muaj. Se krejt kjo krizë është inskenim i një beteje të Don Kishotit me mullinj të erës.
Kosova mund të bëhet lehtë.
Është e jona. Do ta bëjmë!
