“Ishim të gatshëm ta votonim”, Murati-Abdixhikut: Kjo është tallje me qytetarët
Në një reagim paraditen e së martës, Lumir Abdixhiku në një përgjigjje ndaj deklaratës së Presidentes Osmani dje, e cila tha se kishte kërkuar nga partitë politike të mblidhen dhe të votojnë për çështjen e buxhetit për tri komuna, duke theksuar se kjo çështje ka qenë si pikë e veçantë në rend dite, gjë për të cilën Kryetari i LDK-së tha se e vërteta është krejt ndryshe.
Sipas Abdixhikut, ai ia kishte shprehur gatishmërinë Presidentes së vendit që të votohet një pako, e cila madje mund të quhej edhe Pako e Presidentes; me zgjatimin e buxhetit për 3 muaj, me votimin e Ligjeve të Prishtinës e Gjilanit, me sigurimin e pagave për RTK-në, si dhe me votimin e Pakos Evropiane të Rritjes.
Ndaj deklaratës së kreut të LDK-së, ka reaguar Ministri në detyrë i Financave, Hekuran Murati, duke e quajtur deklaratën e Abdixhikut “tallje me qytetarët”.
“E pse nuk i votuat pra kur e kishit mundësinë? Deri dje keni thënë se seanca ka qenë anti-kushtetuese, prandaj s’keni marrë pjesë. Tash po del që paskeni pasë me i votu, por s’ju ka pëlqy mënyra e ftesës. Kjo është tallje me qytetarët”, shkruan Murati në Facebook.
