Organizohet ceremonia e çmimit letrar “Beqir Musliu 2022”

Në prag të festave të Nëntorit organizohet ceremonia e çmimit letrar “Beqir Musliu 2022”.

Kohë më parë, Zyra e kryetarit të komunës së Gjilanit dhe Ars Club “Beqir Musliu”, nënshkruan një Marrëveshje mirëkuptimi për organizimin e përzgjedhjes dhe dhënies së çmimit të përvitshëm letrar, “Beqir Musliu”, përmes Shtëpisë Botuese “Beqir Musliu”, dhe atë në prag të festave të nëntorit e në kuadër të Manifestimit Tradicional Kulturor “Vjeshta letrare e Gjilanit” = edicioni i trembëdhjetë, që tashmë veç ka filluar.

Shih për këtë, deri më 15 Nëntor 2022, Organizatori i këtij çmimi fton dhe mirëpret propozimet meritore nga ana e subjekteve letrare e institucioneve bibliotekare, si dhe shoqatave të shkrimtarëve nga Kosova, Shqipëria, Maqedonia e Veriut, por edhe trevave tjera shqiptare të Ballkanit dhe mërgatës sonë, për këtë Çmim letrar i cili vlerëson dhe shpërblen arritjet letrare, prurjet e reja në letërsi, si dhe rrumbullakësimin e një karriere letrare, me emrin e njërit nga figurat më emblematike të letërsisë sonë bashkëkohëse, Beqir Musliu.

Propozimet duhet të jenë në përputhje me Rregulloren e këtij Çmimi letrare, të miratuar nga Kuvendi i Komunës së Gjilanit si dhe të shoqërohen me:

– një biografi të plotë të jetës dhe krijimtarisë letrare të të propozuarit, (nominuarit);

– me një arsyetim argumentues dhe përmbledhës për vlerat letrare, prurjet e reja në letërsi dhe veçantitë krijuese të të propozuarit (nominuarit), si dhe

– Me nga një kopje të veprave, apo kompletit të veprave të të propozuarit (nominuarit), thuhet në njoftimin zyrtar.

Propozimet mund të adresohen përmes postës ose drejtpërdrejtë në Bibliotekën e Qytetit “Fan S. Noli”, Rr. “Abdullah Tahiri” p. n. – Gjilan; në faqen e Ars Clubi “Beqir Musliu” – Gjilan në Facebook, apo në adresën elektronike të editorit të Shtëpisë Botuese “Beqir Musliu”, z. Sabit Rrustemi: rrustemi1959@gmail.com, më së voni deri më 15 nëntor 2022, ora 24:00h.

Propozimet e pakompletuara e që nuk i përmbushin kriteret e kërkuara me rregulloren e këtij çmimi, nuk do të merren parasysh.

Një Juri profesionale, do t’i shqyrtojë propozimet e arritura dhe do të komunikojë emrin e fituesit, si rëndom, pak ditë para ceremonisë së dhënies së këtij çmimi, e cila është parapa të mbahet më 26 nëntor 2022.

Çmim letrar e jep kryetari i komunës së Gjilanit, z. Alban Hyseni, nën përkujdesjen e të cilit mbahet ceremonia, thuhet në njoftim.