Nga Turqia raportohet se Zhegrova mund t’i bashkohet Fenerbahces
Emri i Edon Zhegrovës ka qenë i lakuar shumë për një transferim të mundshëm në Serie A, ku është përmendur emri i Napolit.
Mirëpo e ardhmja e Edon Zhegrovës mund të jetë në Superligën turke.
Media turke Sporx, raporton se është Fenerbahce që ka hyrë fuqishëm në garë për të siguruar shërbimet e yllit të Kosovës.
Klubi i drejtuar nga Jose Mourinho raportohet se po përgatit ofertën e parë rreth 20 milionë euro, ndërkohë që Lille e vlerëson fantazistin shqiptar 25 milionë euro.
Trajneri portugez e pëlqen shumë Zhegrovën dhe ka kërkuar nga drejtuesit e klubit të bëjnë të mundur transferimin e tij.
Ditët në vijim, pritet të shtohen bisedimet mes dy klubeve, por ajo që mund të thuhet me siguri të plotë është se Edon Zhegrova sezonin e ri nuk do të jetë lojtar i Lille.
Anësori shqiptar i ka bërë të ditur klubit francez se dëshiron të largohet dhe Lille nuk e ka penguar.
Edon Zhegrova iu bashkua Lillet nga Baseli në vitin 2022.
