Ndahet nga jeta në moshën 93-vjeçare ikona e kinematografisë shqiptare, Margarita Xhepa! Dje festoi ditëlindjen
Është ndarë nga jeta në moshën 93 vjeçare, një nga zonjat më të mëdha të teatrit dhe filmit shqiptar, Margarita Xhepa.
Gjatë karrierës së saj, aktorja e madhe Margarita Xhepa ka luajtur mbi 150 role në teatër. Aktorja e madhe shqiptare do të përcillet në banesën e fundit nesër.
Është ndarë nga jeta në moshën 93 vjeçare, një nga zonjat më të mëdha të teatrit dhe filmit shqiptar, Margarita Xhepa.
Sipas burimeve për Report Tv aktorja ndërroi jetë mëngjesin e sotëm rreth orës 3:00 në një spital në Tiranë. Prej kohësh aktorja vuante nga një sëmundje e mushkrive.
Margarita Xhepa do të përcillet në banesën e fundit nesër (4 prill).
BIOGRAFIA
Aktorja u lind më 2 prill 1932, në qytetin e Lushnjës, prej ku nisi edhe hapat e parë drejt karrierës së saj.
Gjatë karrierës së saj të pasur, Margarita Xhepa interpretoi mbi 150 role në teatër dhe 32 role në kinematografi.
Veç suksesit me veprat e shumta të dramaturgëve shqiptarë, Margarita Xhepa ka korrur sukses edhe në rolet e dramaturgjisë botërore si, Ofelia tek “Hamleti”, vajza e dytë tek “Mbreti Lir”, dadoja tek “Romeo e Zhuljeta”, mbretëresha Margaret tek “Rikardi III”, etj.
Në vitin 1997, interpretoi në filmin grek “Mirupafshim” (regjisor J. Koras, K. Vupuras). Filmi u laureua me Çmimin e Madh në Festivalin Ndërkombëtar të Filmit Mesdhetar në Selanik, ndërsa Margarita Xhepa, Çmimin e Nderit.
Në vitin 2007 iu dha “Çmimi i Karrierës” për rolin e Nadjezhnës në monodramën “Kënga e mjellmës” së Çehovit. Krahas teatrit, Xhepa është shfaqur në ekranin e filmit me një galeri të larmishme prej 32 rolesh. Disa prej personazheve që interpretoi mjeshtërisht janë Zyraka te “Vitet e para” (1965), Shano te “Dimri i fundit” (1976), pianistja te “Koncert në vitin 1936” (1978) dhe Lena te “Tokë e përgjakur” (1976).
