Moti javor, javë verore me anticiklonin Afrikan!
E tërë java që po hymë do të karakterizohet me mot stabil dhe me diell. Temperaturat do të shënojnë rritje progresive ose të përditshme deri të premten kur mund të kemi një front të dobët të ftohtë ajror i cili mund të kap disa vise kontinentale sidomos disa vise të Kosovës, veriut të Malit të Zi dhe ndoshta disa vise të Maqedonisë Veriore.
Njëkohësisht kjo javë do të jetë më e nxehta deri më tani në këtë sezonë verore. Temperaturat nga mesjava shënojnë rritje të ndjeshme për shkak të fushes ajrore termime nga Afrika veriore e cila me erërat jugperëndimore do të depërtojnë temperatura të larta në rajonin tonë.
Në tërë rajonin do të kemi temperatura maksimale rreth 35 gradë Celsius. Në viset më të ngrohta të Kosovës ato mund të shkojnë deri në 37 ose 38 gradë Celsius, ndërsa në viset më të ngrohta të Shqipërisë, Maqedonisë Veriore dhe Malit të Zi deri në 40 gradë Celsius.
Të premten pasdite do të kemi frontin e dobët që ulë paksa temperaturat ndërsa mund të kemi edhe zhvillimin e ndonjë rrebeshi ose stuhie të izoluara, por kjo mbetet të shihet me evoluimin e gjendjes sinoptike gjatë javës.
Pas uljes së lehtë të temperaturave të premten dhe të shtunën ato do të shënojnë rritje sërish menjëherë nga e diela ku do të kemi vazhdimin e valës tropikale. Gjatë kësaj jave pritet të kemi edhe disa netë tropikale ku temperatura minimale nuk do të zbresë nën 20 gradë Celsius, por kjo nuk do të ndodhë në tërë territorin.
Burimi i lajmit: /METEOBALLKAN
