Ministrja Gërvalla priti në takim Ambasadoren e Republikës së Estonisë , znj. Janne Jõesaar-Ruusalu
Zëvendëskryeministrja dhe Ministrja e Punëve të Jashtme dhe Diasporës, znj. Donika Gërvalla-Schwarz priti Ambasadoren jorezidente të Republikës së Estonisë, znj. Janne Jõesaar-Ruusalu.
Ajo fillimisht i uroi mirëseardhjen duke vënë theks të veçantë në marrëdhëniet e shkëlqyera mes dy vendeve tona, bashkëpunimin dhe mbështetjen e Estonisë dhënë Kosovës në fushën e Teknologjisë Informative, si dhe zhvillimin e ngritjen e mëtutjeshme të marrëdhënieve ekonomike, diplomatike e kulturore.
Ministrja Gërvalla falënderoi ambasadoren për mbështetjen e fuqishme që Estonia që po i jep Kosovës në BE, në NATO dhe në Këshillin e Evropës.
“Republika e Kosovës ka orientim të qartë euro-atlantik dhe punon çdo ditë që të arrijë objektivat e saj në këtë drejtim, duke forcuar subjektivitetin dhe pozicionin e saj në arenën ndërkombëtare dhe duke trasuar rrugën e saj drejt NATO-s dhe Bashkimit Evropian”, tha ajo.
Temë e bisedës ishte edhe siguria në Kosovë dhe rajon, roli destruktiv i Serbisë në rajonin e Ballkanit dhe cenimi i sigurisë së vendeve të Baltikut e Evropës nga ana e Rusisë.
Ministrja Gërvalla theksoi se Kushtetuta e Republikës së Kosovës garanton të drejta shumë më të gjëra sesa në të gjitha vendet e tjera evropiane për të gjitha komunitetet që jetojnë në Kosovë, dhe në veçanti komuniteti serb, i cili madje edhe brendapërbrenda komuniteteve pakicë gëzon privilegje të shumta. Kosova garanton respektimin e drejtave të të gjithë qytetarëve të saj, duke përfshirë respektimin e identitetit individual dhe kolektiv të tyre, avancimin kulturor e arsimor të të gjitha komuniteteve.
