Ministri Çeku dhe zëvendësminstrja Osmani takojnë Presidentin e Komitetit Olimpik të Evropës (EOC), Spyros Capralos dhe sekretarin e përgjithshëm, Raffaelo Pagnozi
Ministri Çeku dhe zëvendësminstrja Osmani kanë pritur sot në takim Presidentin e Komitetit Olimpik të Evropës (EOC), Spyros Capralos dhe sekretarin e përgjithshëm, Raffaelo Pagnozi.
Capralos shoqërohej nga drejtuesit e KOK-ut, presidenti Ismet Krasniqi e sekretari i përgjithshëm, Besim Aliti, si dhe drejtuesit e KOKSh-it, presidenti Fidel Ylli e sekretari i përgjithshëm, Gerti Shima.
Në takim diskutuan për kandidaturën e fituar të Kosovës për organizimin e Lojërave Mesdhetare Prishtina 2030, investimet që do të bëhen në infrastrukturën sportive, si dhe përkushtimin që ka Qeveria për zhvillimin e sportit.
Ministri Çeku foli për sukseset e vendit tonë në sport, organizimet ndërkombëtare që po bëhen në vend dhe përkushtimin që ka MKRS në mbështetjen e lëvizjes olimpike në Kosovë dhe sportit në përgjithësi, si dhe projektin e MKRS për përfshirjen e sporteve të caktuara në shkolla.
Presidenti Capralos veçoi të arriturat e sportit tonë, me theks të veçantë tri medaljet olimpike të Kosovës dhe progresin që ka bërë KOK-u, në vitet e fundit.
Presindeti i KOK-ut, Ismet Krasniqi, falënderoi EOC-un me në krye Capralosin për bashkëpunimin dhe mbështetjen e KOK-ut në projekte të ndryshme, derisa u shpreh mirënjohës edhe për Qeverinë e Kosovës dhe MKRS-në për mbështetjen e fuqishme në fitimin e Lojërave Mesdhetare Prishtina 2030.
I pari i KOKSh-it, Fidel Ylli, theksoi se bashkëpunimi mes dy Komiteteve Olimpike është në nivel të lartë, jo vetëm për organizimin e LM Prishtina 2030, por edhe në projekte të ndryshme të përbashkëta, derisa përgëzoi infrastrukturën ligjore që ka Kosova.
