Mbyllet afati i konkursit për rektor të Universitetit “Kadri Zeka”, këta janë emrat e 5 kandidatëve për pasues të Bajram Kosumit
Gjilan, 27 qershor 2023 – Pas një periudhe kohore, prej se është hapur konkursi për rektor të ri të Universitetit Publik “Kadri Zeka” në Gjilan, më 7 qershor 2023, Në bazë të nenit 19, paragrafi 1, të Ligjit mbi Arsimin e Lartë të Republikës së Kosovës dhe nenit 23 parag. 1 nënparag. 1.9 dhe nenit 27 të Statutit të Universitetit, sot, më 27 qershor 2023, është mbyllur afati i konkursit, pasi ka kaluar periudha e paraparë sipas vendimit të Këshillit Drejtues të UKZ-së, përfshirë edhe afatin e arritjes së kandidaturave me postë, ka deklaruar sekretari i UKZ-së, Vaxhid Sadriu për TV Gjilani.
Sekretari i UKZ-së më tej ka thënë se janë paraqitur pesë kandidatë, katër nga të cilët janë profesorë nga profesorati i këtij universiteti.
“Janë paraqitur tre profesorë të asociuar dhe dy profesorë asistentë: – Prof. Dukagjin Leka, Prof. Xhevat Sopi, Prof. Artan Dërmaku, Prof. Xhavit Islami dhe Fadil Osmani”, ka thënë Sadriu.
Sekretari i UKZ-së, më tej ka nënvizuar se Senati pritet të emëroj një komision për verifikimin e dosjeve dhe ata kandidatë që i plotësojnë kriteret e parapara sipas konkursit, procedohen për më tej, tek Këshilli Drejtues, i cili më pas zgjedh njërin nga ta.
“Me vet faktin se këtu kemi një prorektor, Prof. Dukagjin Leka, pastaj dekanin Xhevat Sopi, dekanin Artan Dërmaku etj, dëshmohet se konkurrentët janë kandidatë që gëzojnë një prestigj pasi kanë qenë në pozita menaxheriale dhe kësisoji edhe këkohet, d. m. th., kërkohet edhe aftësi menaxhuese nga ana e kandidatëve”, ka shtuar më tej Sadriu.
Sipas sekretarit të UKZ-së, zgjedhja e rektorit të ri pritet më 6 korrik, kur është parapa intervistimi i kandidatëve.
“Kjo është pak a shumë procedura: komisioni ka për detyrë t’ia dorëzoj listat, me emrat e kandidatëve që i plotësojnë kriteret, ndërsa Këshilli Drejtues më pas mund ta aprovoj listën, për të vijuar me hapat e mëtejmë të përzgjedhjes së rektorit të ri të UKZ-së”, ka përfunduar z. Sadriu./Tv Gjilani/
