Mblidhet PDK, paralajmërohen vendime të rëndësishme
Partia Demokratike e Kosovës do të mblidhet sot për mbledhjen e Këshillit Drejtues.
Temë kyçe do të jetë situata e krijuar në veri të vendit. Për mbledhjen ka folur kryetari i PDK-së, Memli Krasniqi.
“Kam ftuar mbledhjen e Këshillit Drejtues të PDK-së, për të diskutuar për gjendjen e rëndë në vend dhe për rrugën që është para nesh”.
“Mbi të gjitha, për vendimet dhe veprimet që i kërkon kjo periudhë sfiduese.Situata nuk është normale dhe nuk mund ta simulojmë normalitetin. Qytetarët kanë nevojë për qartësi në këtë kohë konfuzioni. Dhe një gjë është më se e qartë: Kosova nuk mund të mbetet edhe më tutje peng e tekeve të Albin Kurtit”, ka shkruar Krasniqi në Facebook.
Ai tha tutje se Kurti po e vendos Kosovën në hartën e vendeve të sanksionuara.
“Ky kryeministër i papërgjegjshëm po e vendosë Kosovën në hartën e vendeve të sanksionuara ku, nga Evropa, bëjnë pjesë vetëm Rusia, Bjellorusia, Moldavia e Republika Srpska”.
Ende nuk është bërë e ditur ora e takimit, por nënkrytarja Vlora Çitaku ka paralajmëruar vendime të rëndësishme që do të dalin nga mbledhja e Këshillit.
