LVV zhvillon takim elektoral në Livoç të Ulët: “Më 7 qershor, hap përpara drejt progresit dhe mirëqenies”
Gjilan – Lëvizja Vetëvendosje ka vazhduar aktivitetet e fushatës zgjedhore në Gjilan, duke mbajtur takim me qytetarët në Livoç të Ulët.
Nga ky subjekt politik u tha se energjia e fitores po ndihet në çdo takim me banorët e lagjeve të qytetit dhe të fshatrave të komunës së Gjilanit, ndërsa 7 qershori u cilësua si një datë e rëndësishme për vendin, ku qytetarët do të vendosin për progresin, drejtësinë dhe mirëqenien sociale.
Në takim morën pjesë kandidatët për deputetë Labinotë Demi Murtezi, Nevzad Asllani, Arbëreshë Kryeziu Hyseni dhe Shpend Nuhiu, të cilët folën për angazhimet dhe projektet që, sipas tyre, duhet të vazhdojnë edhe në mandatin e ardhshëm.
Gjatë aktivitetit u theksua se Kosova ka nevojë për investime konkrete në zhvillimin ekonomik, bujqësi dhe industri. Përfaqësuesit e LVV-së deklaruan se vendi ka nevojë për ndërtimin e pesë digave të reja, të cilat do të shërbenin për mbështetjen e sektorëve prodhues dhe zhvillimin ekonomik.
Takimi në Livoç të Ulët është pjesë e aktiviteteve përmbyllëse të fushatës së Lëvizjes Vetëvendosje në prag të zgjedhjeve të 7 qershorit. /Tv Gjilani.com/
