Lule Elezi mahnit Varshavën me recital në Pallatin Mbretëror mbi Ujë
Artistja gjilanase shkëlqen në një nga hapësirat më prestigjioze kulturore të Polonisë
Pianistja e njohur gjilanase, Lule Elezi, ka korrur një tjetër sukses të rëndësishëm në skenën ndërkombëtare, duke mbajtur një koncert recital në Pallatin mbi Ujë (Pallati në Ishull), një prej monumenteve më të njohura kulturore në Parkun Mbretëror Łazienki të Varshavës, Poloni.
Para një audience të zgjedhur dhe në një ambient me vlera të jashtëzakonshme historike e artistike, Elezi interpretoi vepra të njohura të kompozitorëve shqiptarë dhe botërorë, duke sjellë emocione të veçanta dhe një performancë të nivelit të lartë artistik.
“Hapësirat ikonike të Pallatit mbi Ujë dhe ngrohtësia e publikut artdashës më inspiruan dhe më dhanë ndjesi të veçantë gjatë interpretimit”, ka shprehur pianistja pas koncertit.
Ajo ka falënderuar për organizimin dinjitoz institucionin Łazienki Królewskie (Royal Łazienki) dhe Shoqatën Ndërkombëtare Frederic Chopin në Varshavë, si dhe Drejtoreshën e Përgjithshme, znj. Ewa Sławińska, për mikpritjen dhe mbështetjen.
Mirënjohje të veçantë Elezi ka shprehur edhe për Ambasadoren e Republikës së Shqipërisë në Poloni, Shkëlqesinë e Saj Mimoza Halimi, si dhe për Ambasadën e Shqipërisë në Poloni, për praninë dhe përkrahjen e tyre në këtë ngjarje të rëndësishme kulturore.
Po ashtu, ajo ka falënderuar znj. Aleksandra Głowacka, Kryetare e Shoqatës Frederic Chopin në Sanniki, dhe Kryetarin e Shoqatës Poloni–Kosovë, Haxhi Dulla, për mbështetjen e vazhdueshme gjatë aktiviteteve të saj koncertale në Poloni.
Me këtë paraqitje të suksesshme në një nga skenat më të veçanta kulturore të Evropës, Lule Elezi vazhdon të promovojë me dinjitet artin pianistikor dhe kulturën shqiptare në arenën ndërkombëtare, duke e bërë krenar Gjilanin dhe mbarë kombin shqiptar.
