Luka Modric u jep mesazhin e qartë kritikëve: Mos ma përmendni më moshën!
Mesfushori Luka Modric festoi në mënyrën më të mirë të mundshme ditëlindjen e tij të 40-të, duke shënuar golin e parë me fanellën e Milanit dhe i dhënë skuadrës fitoren 1-0 ndaj Bolognas në “San Siro”.
Ndeshja ishte e vështirë për kuqezinjtë, të cilët goditën shtyllën dhe traversën disa herë, ndërsa Bologna pati momente të gjata kontrolli të lojës.
Megjithatë, Modric zhbllokoi rezultatin në minutën e dytë të pjesës së dytë, pas një kombinimi me Alexis Saelemaekers, duke e dërguar topin në rrjetë nga brenda zonës.
Ky ishte goli i tij i parë për Milanin dhe e bën kroatin vetëm lojtarin e pestë në historinë e Serie A që shënon pasi ka mbushur 40 vjeç.
Për Modric, tifoz i Milanit që në fëmijëri, goli në “San Siro” ishte një ëndërr e realizuar.
Pas ndeshjes, kroati kërkoi nga njerëzit që të mos ia përmendin më moshën.
“Ishte një mënyrë e mrekullueshme për të festuar. Fitore mbi të gjitha, kjo është gjëja më e rëndësishme. Shpresoj që njerëzit të mos ma përmendin më moshën.
Ishte një aksion i bukur, Ale më dha një pasim perfekt dhe ishte e lehtë të shënoja – më shumë ishte merita e tij sesa e imja. E gjithë skuadra luftoi fort dhe jam i bindur se ndeshje pas ndeshjeje do të fitojmë më shumë besim.
Me rikthimin e lojtarëve dhe duke u njohur më mirë me njëri-tjetrin, do të bëhemi edhe më të fortë”, deklaroi ai.
