Lista e Kombëtares, Silvinjo sqaron zgjedhjet: Nuk është koha për të rinjtë

Trajneri Silvinjo, ka dalë në konferencë për shtyp, pas shpalljes së listës për dy ndeshjet e muajit shtator, miqësoren ndaj Gjibraltarit dhe sfidën kualifikuese ndaj Letonisë.

Tekniku kuqezi ka analizuar zgjedhjet e bëra, ndërsa i ka dhënë përgjigje pyetjeve të gazetarëve të pranishëm në sallë.

Silvinjo e cilësoi si shumë të rëndësishme ndeshjen ndaj Letonisë dhe për këtë arsye deklaroi se nuk është momenti për lojtarë të rinj në Kombëtare.

Ai gjithashtu zbuloi se po ndiqen disa lojtarë nga Kombëtarja U-21, ndërsa shtoi se ka folur edhe me Nedim Bajramin e Ernest Muçin, të cilët nuk po kalojnë një moment të mirë.

Trajneri brazilian konfirmoi se mesfushori i Dinamos, Klevi Qefalija ishte në listën e pritjes, por nuk u ftua për shkak të një dëmtimi që ka kaluar.

Ne kemi bërë 50% të rrugëtimit, duke qenë se kemi luajtur katër ndeshje. Po luftojmë kundër kohës. Është një ndeshje shumë e rëndësishme ndaj Letonisë. Do përgatitemi mirë. Kam folur me Ismajlin, ka pasur dëmtim të lehtë dhe fola. I thashë që të jetë i qetë, për tu përshtatur me ambientin e ri.

Një grup nuk ndryshon, nëse diçka nuk shkon. Duhet të ndryshohet nëse një lojtar nuk ka çfarë jep për Kombëtaren. Kam besim tek të gjithë lojtarët. Nëse një lojtar jep shenja që nuk dëshiron të jetë në Kombëtare, do të mbetet jashtë. Unë shoh dëshirë te lojtarët për të qenë në kombëtare.

Do ketë ndryshime për ndeshjen me Letoninë, duke qenë se kemi ndeshje miqësore para ndeshjes. Kemi lojtarë që kanë luajtur te U-21, por ende nuk kanë luajtur me ekipin A. Kemi 20 lojtarë që ndjekin, 4-5 janë lojtarë të fortë dhe të mirë. Në kohën e duhur do të vijë momenti i tyre.

Letoninë e kemi parë dhe mund të ketë ndryshime. Bajrami dhe Muçi kanë bërë një rrugëtim në Kombëtare. Vijnë me kënaqësi këtu. Bajrami kishte rrugëtim fantastik në kualifikueset e Europianit. Ndoshta nuk është në formën më të mirë, Muçi ka pësuar një dëmtim të vogël, por luajti 45 minuta dje. Kemi shumë besim te dy lojtarë.

Kam pasur shumë dilema. Puna për listën nis shumë përpara. Që në fillim të gushtit kam filluar të mendoj për listën. Ndeshje si kjo është shumë e rëndësishme. Të sjellësh lojtarë të rinj, ndoshta nuk është momenti. Duhen lojtarë që janë mësuar me skemat tona dhe përgjegjësitë që duhet të marrin. Kam folur shumë me veten, stafin dhe kemi besim se lojtarët do na përgjigjen në fushë.

Kur duhet të zhvillojmë një ndeshje miqësore para asaj zyrtare, është më pak e vështirë, për aspektin e menaxhimit. FSHF ka punuar shumë për të zhvilluar grumbullimin dhe miqësoren.

Miqësoret të japin mundësi të shikosh lojtarët që nuk kanë pasur mundësi në Kombëtare. Jam i bindur që do jetë ndeshje e mirë për tu testuar.

Është momenti jo më i mirë për lojtarët. Shumica e lojtarëve janë të mësuar. Nuk jam i shqetësuar. Është çështje minutazhi.

Qefalija është një lojtar që ka bërë ndeshje të mira me Dinamon. Është një lojtar teknik, luan me këmbën e majtë. Ka një dalje të bukur me topin. Nuk është lojtar fizik. Ishte në listën e pritjes. Për shkak të dëmtimit dhe diskutimit me klubin, nuk u grumbullua. Dajsinani është një portier shumë i shpejtë me këmbë. Më ka surprizuar dhe pëlqyer shumë”, tha Silvinjo.

Grumbullimi i Kombëtares do të nisë të hënën, më 1 shtator, në Malaga, ku kuqezinjtë do të përgatiten për ndeshjen miqësore ndaj Gjibraltarit, e cila do të luhet më 4 shtator në stadiumin “Europa Point”, në orën 18:00.

Më pas, më 5 shtator, Kombëtarja do të rikthehet në Tiranë për të vijuar përgatitjet në kuadër të ndeshjes kualifikuese ndaj Letonisë, që do të zhvillohet më 9 shtator, në stadiumin “Air Albania”, në orën 20:45.

Të dyja ndeshjet do të transmetohen në ekranin e Tv Klan, ashtu si të gjitha takimet e Kombëtares.