Lajmi i Fundit: KQZ-ja vendos për rinumërim të plotë të votave
Komisioni Qendror i Zgjedhjeve ka vendosur të ketë rinumërim të plotë të të gjitha votave në vendvotimet në 28 komuna.
Po ashtu është vendosur të shkarkohen përfaqësuesit politikë në Komisionin Komunal Zgjedhor në Prizren, ku sipas kreut të KQZ-së, Kreshnik Radoniqi, janë vërejtur dallimet më të mëdha në votat për kandidatët për deputetë.
Kryesuesi i KQZ-së, Kreshnik Radoniqi, tha se vendimi është marrë pas analizës së raportit të rinumërimit të më shumë se gjysmës së vendvotimeve, sipas vendimit të datës 13 janar.
“Siç e theksova në fillim, gjatë ditës së sotme, kemi pranuar një raport pas rinumërimit të më shumë se gjysmës së vendvotimeve sipas vendimit të datës 13 janar. Sipas raportit, kur flasim për votat e subjekteve politike, ndryshimet e identifikuar janë minimale dhe pothuajse të papërfillshme. Kjo do të thotë se rezultatet e subjekteve janë numëruar dhe paraqitur saktë”, tha Radoniqi.
