Kurti me fotografi: Policët u kidnapuan në territorin e Kosovës – KFOR-i i pa gjurmët, e habitshme që nuk reagoi
Kryeministri Albin Kurti e prezantoi një hartë përmes së cilës shpjegoi se ku u kidnapuan tre policët e Kosovës nga Policia serbe, raporton Ekonomia Online.
Kurti tha se policët u kidnapuan “në thellësi të territorit të Kosovës” dhe se për këtë, KFOR-i i ka parë gjurmët.
Ai tha se në vendngjarje janë gjetur gjurmë të çizmeve të huaja e në drejtim të Serbisë, teksa tha se është i befasuar me heshtjen e faktorëve ndërkombëtarë për tolerancën ndaj veprimeve të Serbisë.
Tutje, Kurti tha se vazhdon të jetë i habitur me faktin që KFOR-i ende s’ka dalë zyrtarisht me deklaratë, ndonëse ka qenë në vend të ngjarjes.
“Kidnapimi, rrëmbimi ka ndodhur në këtë vend që është thellë në territorin e Kosovë, 1km larg kufirt në njërën anë, që i bie të jetë veriperëndimore, 670m larg që i bie pjesa veriore dhe në pjesën jugperëndimore 300 metra. 1km, 670 metra dhe 300 metra”.
“Në të njëjtë kohë, kemi fotografitë ku shihet haptazi se këta nuk kanë mundur të kalojnë tutje siç pretendon Serbia se kanë shkuar atje dhe janë arrestuar atje. Bëhet fjalë për kidnapim në Kosovë e jo arrestim në Serbi. S’bëhet fjalë për kurrfarë kalimi të PK-së përtej kufirit të Serbisë, bile as përtej rrugës së prerë që ndodhet 1km, 670 metra dhe 300 metra”.
“Në vendin e ngjarjes, kanë qenë KFOR-i e Policia e Kosovës. Aty janë gjetur gjurmët e çizmeve të huaja e në drejtim të Serbisë. Por, janë gjetur edhe prangat lidhëse të plastikës. Pra, si është e mundur që ata pretendojnë se janë arrestuar në Serbi, kur lidhëset e plastikës si pranga janë gjetur në vendin ku po themi ne, 1 kilometër brenda territorit të Kosovës”.
“Serbia s’ka ndryshuar në qëllime, synime e apetite. Nuk është se po na befason me sjelljen e saj, por ajo çka është e çuditshme është heshtja dhe toleranca e faktorëve ndërkombëtarë ndaj veprimeve të Serbisë e cila vazhdimisht kërkon pretekste për eskalim, e kur nuk ka atëherë është e gatshme dhe e aftë t’i krijojë ato”.
Fjala e plotë:
Të nderuar gazetarë të pranishëm,
Të dashur qytetarë,
Mirëmëngjesi dhe ju falënderojmë që i jeni përgjigjur ftesës sonë për këtë konferencë për media.
Sapo përfunduam Mbledhjen e Këshillit të Sigurisë së Kosovës, që u mbajt duke marrë si temë veprimin agresor të Serbisë dje, e cila rrëmbeu tre zyrtarë të Policisë së Kosovës në brendi të territorit të Republikës sonë.
Me anëtarët e Këshillit të Sigurisë diskutuam për situatën e përgjithshme të sigurisë, me theks te katër komunat në veri të vendit dhe brezit kufitar me Serbinë. Institucionet e sigurisë dhanë vlerësimet e tyre, ndanë të dhënat më të fundit dhe gjithashtu propozuan rekomandime.
Rasti i djeshëm ishte agresion ndaj shtetit tonë demokratik, hakmarrje ndaj Policisë së Kosovës që po lufton krimin dhe intencë për përshkallëzim e destabilizim në kohën kur ne tashmë kemi propozuar planin 5-pikësh për depërshkallëzim, pra deeskalim dhe për normalizim.
Për këto arsye institucionet tona të rendit dhe sigurisë kanë e rritur nivelin e gatishmërisë.
Për arsye të sigurisë, si hap i menjëhershëm dhe i domosdoshëm, janë shtrënguar kontrollet kufitare me Serbinë, duke kufizuar qarkullimin dhe duke shtuar kontrollet e automjeteve që vijnë nga Serbia, sidomos ato transportuese.
Cenimi i djeshëm i kufirit nga Serbia, na detyron që të rrisim kontrollet kufitare, që varësisht nga analizat dhe vlerësimet e vazhdueshme të institucioneve të sigurisë mund të përfshijnë edhe ndalesa të qarkullimit në rastet kur vlerësohet se mund të përbëjnë apo nuk mund të garantohet siguria
Veprimet e radhës do të merren në bazë të rekomandimeve të institucioneve përkatëse.
Synimi ynë është siguria e siguria fillon te kufijtë.
Ne edhe një herë kërkojmë lirimin e menjëhershëm të tre zyrtarëve të rrëmbyer policorë dhe u bëjmë thirrje faktorëve ndërkombëtarë që ta dënojnë këtë akt agresioni të Serbisë dhe të bëjnë trysni mbi Beogradin zyrtar.
Serbia nuk ka ndryshuar asnjëherë në qëllime, motive dhe apetite. Nuk është se po na befason me sjelljen e saj. Ajo çfarë është e çuditshme është heshtja dhe toleranca e faktorëve ndërkombëtarë ndaj veprimeve të Serbisë, e cila vazhdimisht kërkon pretekste për eskalim dhe destabilizim. E kur nuk ka, atëherë është e gatshme dhe sigurisht e aftë që t’i krijon ato. Rrëmbimi i tre Policëve të Kosovës është dëshmia më e qartë dhe më e freskët për këtë.
Ju falemnderit e tash po ia kaloj fjalën Ministrit të Punëve të Brendshme të Qeverisë së Republikës së Kosovës, z.Xhelal Sveçla.
