Kryetari i Gjilanit dhe Ministri Aliu, vizitojnë ngastrat kadastrale ku pritet të ndërtohen banesat e proklamuara 120 x 120 dhe 150 x 150
A pritet të filloj implementimi i projektit të proklamuar i Qeverisë Kurti 120 X 120 dhe 150 X 150? – Kjo është njëra nga ato pyetjet e shtruara, që varësisht se si e sheh, nga konteksti apo këndvështrimi, vlenë 1 milionë dollarë!
Në fakt, sot gjatë ditës kryetari i Gjilanit Alban Hyseni, së bashku me Ministrin Liburn Aliu e deputetin Luan Aliu kanë vizituar pjesë të pronës publike, nga ngastrat kadastrale, si njëri nga lokacionet e mundshme për ndërtimin e objekteve banesore, të premtuara nga Kampi i kryeministrit Kurti në kohën e fushatës zgjedhore për zgjedhjet e kaluara nacionale.
Lajmi e ka publikuar vet kryetari i Komunës së Gjilanit, Alban Hyseni, në faqen e tij në rrjete sociale.
“Bashkë me ministrin Liburn Aliu, vizituam parcelën publike të cilën e kemi identifikuar për ndërtimin e banesave me çmime të përballueshme, të cilat kanë për qëllim rritjen e cilësisë së jetës së qytetarëve tanë. Ndërtimi i banesave moderne me çmime të përballueshme do të kontribuoj dukshëm në mirëqenien e qytetarëve dhe zhvillimin ekonomik të vendit”, ka shkruar Hyseni.
Ai më tej ka potencuar se së bashku me Ministrin Aliu kanë biseduar edhe për qarkoren e re të qytetit, e cila sipas tij, parashihet të lidhë qytetin e Gjilanit me Autostradën, e cila parashihet të kaloj për skaj të qytetit, sipas projektit të paraparë, deri tek Dheu i Bardhë.
“Gjithashtu, nga Ministri Aliu kërkova që sa më shpejtë të fillojë realizimi i projektit të Qarkores së re të Qytetit, e cila e lidh qytetin e Gjilanit me Autostradën, me qëllim që nevojat urgjente të banorëve tanë të marrin formë sa më shpejtë”, ka përfunduar Hyseni.
