KQZ: Po vazhdon numërimi i votave me postë

(E plotësuar, ora 23: 24) Komisioni Qendror i Zgjedhjeve ka bërë të ditur se është duke vazhduar edhe sot numërimi i fletëvotimeve me postë. Në një postim në Facebook janë treguar edhe qytetet ku ka përfunduar numërimi i fletëvotimeve.

“Deri në përfundim të ditës së premte, në këtë qendër janë numëruar fletëvotime që i takojnë votuesve të komunave Deçan, Gjakovë, Leposaviq, Novobërdë, Shtërpcë, Zubin Potok, Zveçan, Mamushë, Hani i Elezit, Graçanicë, Ranillug, Kllokot dhe Mitrovicë e Veriut”, thuhet në njoftim.

KQZ thekson se në proces të numërimit janë fletëvotime të ndara në kuti të votimit që u takojnë komunave Deçan, Gjilan, Dragash, Drenas, Istog, Klinë, Kamenicë dhe Kaçanik.

Numri i pakove të supozuara me fletëvotime dhe që janë aprovuar nga KQZ, pas procesit të vlerësimit, është më shumë se 63 mijë sosh.

14.36% të votave përmes postës

Numërimi i votave që kanë ardhur nga jashtë Kosovës, përmes postës, vazhdon në Qendrën e Numërimit të Rezultateve të Komisionit Qendror të Zgjedhjeve.

Në përditësimin më të fundit, Komisioni Qendror i Zgjedhjeve ka publikuar rezultatet e numërimit të 14.36 për qind të votave të ardhura me postë Lëvizja Vetëvendosje deri më tani ka marrë 44.33 % të votave. E dyta është Lidhja Demokratike e Kosovës që deri më tani ka 33.55% të votave me postë.

Në vend të tretë aktualisht qëndron koalicioni i AAK-së dhe Nismës me 9.68%. E katërta është Partia Demokratike e Kosovës me 6.48 %.Publikohen rezultatet e para të votave me postë

Komisioni Qendror i Zgjedhjeve ka nisur publikimin e rezultateve të votave përmes postës.

Nga numërimi i 8.51 për qind të votave, Lëvizja Vetëvendosje është e para me 1293 vota apo 45.79 për qind, e dyta është Lidhja Demokratike me 1010 vota apo 35.76 për qind, pasohet nga koalicioni AAK-Nisma me 335 vota apo 11.86 për qind dhe Partia Demokratike që ka 98 vota apo 3.47 për qind.

Procesi i numërimit do të vazhdojë, ndërsa rezultatet pritet të pasqyrojnë ndikimin e diasporës në zgjedhjet e fundit.

Votat e numëruara deri tash janë nga komunat Deçan (5 kuti nga 6), Gjakovë (2 nga 12 kutitë), Novobërdë (1 kuti), Shtërpcë (1 kuti), Zveçan (1 kuti), Mamushë (1 kuti), Hani Elezit (1 kuti), Graçanicë (1 kuti), Ranillugë (1 kuti), Kllokot (1 kuti), Mitrovicë e Veriut (1 kuti).

Kurse, nga numërimi i votave në përfaqësitë diplomatike, LVV-ja doli e para bindshëm.