KQZ-ja cakton afatin për deklarimin e koalicioneve për zgjedhjet e jashtëzakonshme të 28 dhjetorit
Komisioni Qendror i Zgjedhjeve ka nisur zyrtarisht përgatitjet për zgjedhjet e jashtëzakonshme parlamentare, që do të mbahen më 28 dhjetor të këtij viti.
Në faqen zyrtare, KQZ-ja ka publikuar edhe afatet për subjektet politike, përfshirë periudhën brenda së cilës ato mund të deklarohen për pjesëmarrje në zgjedhje përmes koalicioneve.
“Sipas afateve zgjedhore, afati për deklarimin e partive politike për pjesëmarrje në zgjedhje përmes koalicioneve fillon më 24 nëntor dhe përfundon më 30 nëntor 2025”, thuhet në njoftimin e KQZ-së.
Kujtojmë se legjislatura e nëntë e Kuvendit të Kosovës është shpërndarë të enjten nga presidentja Vjosa Osmani. Pas konsultimeve me liderë të partive politike, Osmani e ka caktuar 28 dhjetorin si datë për mbajtjen e zgjedhjeve të parakohshme, me gjithë që në partitë që në legjislaturën e kaluar ishin në opozitë shprehën kërkesë që ato të mbahen 21 dhjetor.
Gjatë një konference për media, pas takimit që mbajti me përfaqësuesit e partive politike, Osmani tha se tetë parti ishin për mbajtjen e zgjedhjeve në atë datë, ndërsa pesë për 21 dhjetorin, dhe se tri parti thanë se cilado datë do të ishte në rregull për to.
Osmani tha se si presidente e Kosovës e ka për detyrë “të jap afatin më të gjatë e jo më të shkurtër që të eliminojmë disa nga sfidat e organizimit të shpejtë të zgjedhjeve”.
Kosova ishte në ngërç institucional që prej zgjedhjeve parlamentare të 9 shkurtit. Vetëvendosje fitoi shumicën, por jo mjaftueshëm për të formuar Qeverinë vetëm.
VV-ja propozoi dy mandatarë për kryeministër. Albin Kurti dhe mandatari i dytë, Glauk Konjufca dështuan të marrin votat e nevojshme për të formuar qeverinë.
