Kosova shtet i xhudos, MKRS prezanton projektin e Qendrës Nacionale të Xhudos në Pejë

Ministria për Kulturë, Rini e Sport ka njoftuar se janë bërë hapa të rëndësiëshëm drejt realizimit të projektit Qendra Nacionale e Xhudos në Pejë.

MKRS: “Projekti i Qendrës Nacionale të Xhudos në Pejë, dëshmia e radhës e përkushtimit tonë për sportin dhe e zbatimit të suksesshëm të programit shtetëror “Kosova shtet i xhudos”, ka shkruar faqja zyrtare e MKRS-së.

Sipas MKRS-së, me miratimin e vendimit për shpronësim, po fillon një fazë e re, ndërtimi i qendrës së parë ndërkombëtare për kampe trajnimi në Kosovë.

“Qendra e re multifunksionale do të ofrojë mjedisin e duhur me standarde evropiane për trajnimet e xhudistëve dhe për organizim të garave ndërkombëtare, siç janë ato të Lojërave Mesdhetare. Do të jetë një destinacion i veçantë që zhvillon turizmin sportive, ndërsa për ekonominë vendore, do të sjellë ndikim pozitiv duke krijuar mundësi të reja të punësimit e investimeve”, thuhet në njoftim.

Më tej përshkruhet projekti i paraparë, sipas të cilit, “Qendra e re, ndër të tjera, përfshin palestrën sportive, sallën, zhveshtoret dhe toaletet, tribunën për shikues, (mbi 700 ulëse), hapësirën për media, 52 dhoma për akomodim dhe bujtinat shtesë, objektin multifunksional me pishina dhe fitness”, përfundon njoftimi.

E lidhur me këtë hap të rëndësiëhm për inaugurimin e qendrës, ka regauar edhe trajneri Driton Kuka. Ai në faqen e tij ka shkruajtur shkurtimisht:

“Ëndrra po behet realitet! Vendi ku farkohen medaljet e Arta Evropiane,Botërore e Olimpike po bëhet me kushtet më optimale për stërvitje Elitare!”