Kosova humbet edhe një startues për përballjen e sotme ndaj Zvicrës?
Kosova sot (e shtunë) është nikoqire e Zvicrës në kuadër të ndeshjes kualifikuese për “Euro 2024”, ndërsa nga kampi i Dardanëve lajmet nuk janë aq të mira.
Dardanët i presin Helvetikët në takimin e Grupit I, i cili pritet të zhvillohet në stadiumin “Fadil Vokrri” me fillim nga ora 20:45.
Ekipi i Primoz Gliha vjen në këtë ndeshje të pestë të grupeve pa fitore (tri barazime dhe një humbje), por synon rezultat pozitiv nga ky takim i vështirë.
Mbrojtësi i djathtë Mërgim Vojvoda ka pësuar një dëmtim në seancën e fundit në “Fadil Vokrri” dhe është në pikëpyetje për ndeshjen e sotme.
Por në këtë pozitë nuk ka edhe shumë probleme pasi që ai mund të zëvendësohet lehtësisht nga Florent Hadërgjonaj.
Ky dëmtim mund ta ndryshojë edhe skemën e Kosovës e cila ishte parashikuar të ishte 3-5-2.
