Kampionati vetjak në shahun blic, Korab Saraçi- kampion i Kosovës 2022
Krahas Kampionatit vetjak të Kosovës që po mbahet me moton ” Festivali i shahut” në ambientet e Hotelit Grand Prishtina, të shtunën pas dite janë zhvillua garat e Kampionatit të Kosovës në shahun blic 3′ + 2 sekonda sipas rregullave të FIDE për shahun blic.
Në këtë garë morën pjesë 75 shahistë të cilët garat i zhvilluan sipas sistemit zvicëran me 13 xhiro.
Titullin e kampionit e fitoi, Korab Saraçi. Ai me 11 fitore, një remi dhe një disfatë me 11,5 pikë të tubuara me plotë meritë e fitoi titullin e kampionit të Kosovës 2022. Ai të vetmen humbje e pësoi nga Mjeshtri Ndërkombëtar, Bedri Sadiku dhe remizoi me Mjeshtrin tjetër Ndërkombëtar, Nderim Saraçi.
Pas tij u renditën Nderim Saraçi dhe Endrit Uruçi me nga 11 pikë, Bedri Sadiku me 10, Muhamet Asllani me 9,5 pikë e kështu me radhë.
Kampioni do ta përfaqësoj Kosovën në Kampionatin Evropian që mbahet nga 15 deri më 18 dhjetor të këtij viti në Katovicë të Polonisë.
