Kamenica pjesë e panelit të diskutimit në Samitin Rajonal për Luftimin e Diskriminimit Racor
Komuna e Kamenicës ishte e përfaqësuar në Samitin Rajonal për Luftimin e Diskriminimit Racor dhe Avancimin e Përfshirjes së Romëve, Ashkalinjëve dhe Egjiptianëve, i cili u mbajt më 16–17 dhjetor 2025, në Hotel Sirius, Prishtinë.
Në kuadër të këtij samiti, Koordinatorja e Njësisë Komunale për të Drejtat e Njeriut dhe Mbrojtje nga Diskriminimi (NJKDNJ), Nazmije Demolli Kastrati, mori pjesë në cilësinë e panelistes në panelin me temë: “Buxhetimi i përgjegjshëm ndaj komuniteteve Rome, Ashkalinj dhe Egjiptiane dhe menaxhimi i financave publike.”
Gjatë këtij paneli, Znj. Demolli Kastrati prezantoi praktikat e mira të Komunës së Kamenicës në fushën e buxhetimit gjithëpërfshirës, duke theksuar qasjet konkrete që synojnë adresimin e nevojave të komuniteteve Rome, Ashkalinj dhe Egjiptiane përmes planifikimit transparent dhe të ndjeshëm të buxhetit publik. Këto praktika u vlerësuan si shembuj pozitivë që mund të shërbejnë si model për komunat e tjera, në funksion të avancimit të barazisë, përfshirjes sociale dhe parandalimit të diskriminimit.
Samiti mblodhi përfaqësues institucional, organizata të shoqërisë civile dhe partnerë ndërkombëtarë nga rajoni, duke trajtuar diskriminimin strukturor dhe antigjipsizmin, si dhe duke reflektuar mbi zbatimin e Kornizës Strategjike të Bashkimit Evropian për Romët, Ashkalinjtë dhe Egjiptianët 2020–2030.
Në këtë ngjarje ishte e pranishme edhe Zyrtarja për Barazi Gjinore e Komunës së Kamenicës, Kosovare Maroca Berisha, e cila e përcolli nga afër punën dhe diskutimet e samitit.
Pjesëmarrja e Komunës së Kamenicës në këtë samit konfirmon angazhimin institucional për qeverisje të mirë, buxhetim të përgjegjshëm dhe mbrojtje të të drejtave të njeriut, duke kontribuar në ndërtimin e politikave publike gjithëpërfshirëse dhe të qëndrueshme.
Ngjarja u organizua nga Zyra për Qeverisje të Mirë – Zyra e Kryeministrit, në bashkëpunim me Terre des hommes në Kosovë, Zërin e Romëve, Ashkalive dhe Egjiptianëve dhe Fondacionin HEKS, në kuadër të projektit “Drejtësia Sociale për Romët, Ashkalitë dhe Egjiptianët”, i financuar nga Agjencia Zvicerane për Zhvillim dhe Bashkëpunim (SDC).
