Interesim i jashtëzakonshëm medial për ndeshjen Drita – FCSB!
Të enjten skuadra e trajnerit Zekirija Ramadani, zhvillon ndeshjen e kthimit në stadiumin “Fadil Vokrri” në Prishtinë ndaj skuadrës rumune FCSB, në kuadër të rrethit të dytë parakualifikues në Europa League, shkruan TV Gjilani.
Bazuar në interesimin e shikuesve për të siguruar bileta, pritet që në tribuna të stadiumit të shënohet numër rekord i shikueshmërsë.
Porse, interesim akoma më të shtuar pritet të ketë në tribuna të destinura për media. Kështu lë të kuptohet menaxhmenti i klubit gjilanas, duke u bazuar në përgjigjen për akreditim të gazetarëve dhe fotoreporterëve, ku nënvizohet interesimi i madh medial.
“Së pari, ju kërkojmë ndjesë që ky e-mail po ju arrinë në këto orë të vona, por për shkak të numrit të madh të kërkesave për akreditim, ka qenë e vështirë t’ua dërgojmë më herët”, thuhet në përgjigjen e klubit përkitazi me konfirmimin për akreditim të gazetarëve.
Aty theksohet se interesimi i madh ka determinuar domosdonë e mobilzimit të përgjithshëm të stafit organizativ të FC Drita, ndaj luten gazetarët që të shmangin tollovitë, duke u pajisur me akreditimet përkatëse nga ora 17:30 deri në 19:15 të ditës së enjte, 14 gusht 2025, kur zhvillohet ndeshja.
“Ju lutemi të respektoni këtë orar, pasi, pas kësaj kohe do të kemi angazhime shtesë me organizimin e aktiviteteve brenda stadiumit dhe mund të kemi vështirësi në shpërndarjen e akreditimeve”, thuhet po aty./TV Gjilani.
