Haziri: LDK më unike se kurrë, mobilizim në Gjilan për rikthimin në qeverisje
Kryetari i Degës së LDK-së në Gjilan, Lutfi Haziri, ka njoftuar se janë mbajtur takime me strukturat e degës për riorganizim, ristrukturim dhe mobilizim të plotë.
Takimet kanë përfshirë nëndegët, forumet dhe komisionet sektoriale, në frymën e deklaratës së Kuvendit të 31 janarit.
“LDK është më unike se kurrë dhe po punojmë në vazhdimësi për bashkimin e qendrës së djathtë dhe bashkimin me qytetarët për të mbrojtur vlerat e demokracisë,” ka shkruar Haziri.
Ai theksoi se parimi i meritës, uniteti i brendshëm, hapja ndaj të rinjve dhe përfaqësimi qytetar po ndihmojnë në krijimin e një fryme të përbashkët për familjen dhe Republikën.
Haziri e cilësoi shqetësuese mungesën e investimeve qeveritare në Gjilan. “Gjilani, si qendra më e madhe në Anamoravë, vazhdon të përjashtohet nga kujdesi i qeverisë qendrore në investime,” tha ai.
Sipas tij, vetëm me rikthimin e LDK-së në udhëheqjen e qeverisë qendrore do të rikthehet edhe kujdesi për Gjilanin në investimet komunitare.
